नेवासा : महाराष्ट्र शासनाच्या वतीने घेण्यात आलेल्या एमएचटी-सीईटी (MHT-CET) २०२६ (PCM ग्रुप) परीक्षेचा निकाल नुकताच जाहीर झाला असून, यात नेवासा तालुक्यातील सुरेगाव येथील जयदीप अनिल शिंदे याने दैदिप्यमान यश संपादन केले आहे. जयदीपने पहिल्याच प्रयत्नात तब्बल ९९.६४ पर्सेंटाईल गुण मिळवून नेवासा तालुक्यात प्रथम क्रमांक पटकावण्याचा मान मिळवला आहे. त्याच्या या उल्लेखनीय यशामुळे सुरेगावसह संपूर्ण तालुक्यात आनंदाचे वातावरण निर्माण झाले आहे.
विशेष म्हणजे जयदीपचे शिक्षण अत्यंत प्रतिकूल आणि ग्रामीण परिस्थितीत झाले आहे. त्याचे इयत्ता ८ वी ते १० वीपर्यंतचे शिक्षण सुरेगाव (गंगा) येथील सावित्रीबाई फुले माध्यमिक विद्यालयात झाले. ग्रामीण भागात मर्यादित शैक्षणिक सुविधा उपलब्ध असतानाही त्याने जिद्द, चिकाटी आणि कठोर परिश्रमाच्या जोरावर राज्य पातळीवरील अत्यंत स्पर्धात्मक मानल्या जाणाऱ्या परीक्षेत हे घवघवीत यश संपादन केले आहे.
जयदीपचे वडील अनिल साहेबराव शिंदे आणि आई अंजुषा शिंदे यांनी मुलाच्या शिक्षणासाठी घेतलेल्या कष्टाचे आज खऱ्या अर्थाने चीज झाले आहे. कोणत्याही मोठ्या शहरातील क्लासेसचा आधार न घेता, घरातूनच नियमित आणि नियोजनबद्ध अभ्यास करून जयदीपने मिळवलेले हे यश अनेक विद्यार्थ्यांसाठी प्रेरणादायी ठरत आहे.
निकाल जाहीर झाल्यानंतर सुरेगाव ग्रामस्थांच्या वतीने जयदीप शिंदे व त्याच्या पालकांचा सत्कार करण्यात आला. भविष्यात नामांकित अभियांत्रिकी महाविद्यालयात प्रवेश घेऊन देशसेवा करण्याचे जयदीपचे स्वप्न असून, त्याच्या या यशाबद्दल सर्व स्तरांतून अभिनंदन आणि कौतुकाचा वर्षाव होत आहे.
