बँकॉक (थायलंड) येथे आयोजित आंतरराष्ट्रीय परिषदेत “उत्कृष्ट पर्यावरणीय शाश्वतता पुरस्कार” प्राप्त करून देशाचे व महाराष्ट्राचे नाव उंचावणारे फक्राबाद येथील सुपुत्र, युवा शास्त्रज्ञ व जैवविविधता संशोधक रणजित रावसाहेब राऊत यांचा ग्रामीण आरोग्य प्रकल्प, जामखेड येथे विशेष सत्कार करण्यात आला.
ग्रामीण आरोग्य प्रकल्पाच्या संचालिका डॉ. शोभाताई अरोळे यांच्या हस्ते रणजित राऊत यांना शाल, पुष्पगुच्छ, सन्मानचिन्ह व सन्मानपत्र प्रदान करून गौरविण्यात आले. पर्यावरण संरक्षण, जैवविविधता संवर्धन आणि शाश्वत विकास क्षेत्रात केलेल्या उल्लेखनीय कार्याची दखल घेत हा सन्मान करण्यात आला.
यावेळी ग्रामीण आरोग्य प्रकल्प जामखेडचे ज्येष्ठ समाजसेवक जयेश कांबळे तसेच मधुकर वाळूंजकर उपस्थित होते. उपस्थित मान्यवरांनी रणजित राऊत यांच्या संशोधन कार्याचे कौतुक करत ग्रामीण भागातील युवकांनी विज्ञान, पर्यावरण, जैवविविधता संवर्धन व संशोधन क्षेत्रात पुढे येण्यासाठी प्रेरणा घ्यावी, असे मत व्यक्त केले.
रणजित राऊत यांनी पर्यावरणीय शाश्वतता, जैवविविधता संवर्धन आणि समाजाभिमुख संशोधनाच्या माध्यमातून राष्ट्रीय व आंतरराष्ट्रीय स्तरावर उल्लेखनीय कार्य केले आहे. बँकॉक येथे मिळालेला हा आंतरराष्ट्रीय सन्मान त्यांच्या कार्याची जागतिक स्तरावर झालेली दखल असल्याचे मान्यवरांनी सांगितले.
सत्काराबद्दल कृतज्ञता व्यक्त करताना रणजित राऊत यांनी हा पुरस्कार पर्यावरण संरक्षणासाठी कार्य करणाऱ्या सर्व संशोधक, मार्गदर्शक, विद्यार्थी आणि सहकाऱ्यांना समर्पित असल्याचे सांगितले. त्यांच्या या यशाबद्दल विविध स्तरांतून अभिनंदनाचा वर्षाव होत आहे.
