श्री स्वामी समर्थ दिंडोरीप्रणित सेवा मार्गाचा उपक्रम; १८० महिलांचा उत्स्फूर्त सहभाग
पुणे (थेरगाव), दि. १८ :
अखिल भारतीय श्री स्वामी समर्थ आध्यात्मिक गुरुपीठ व श्री स्वामी समर्थ दिंडोरीप्रणित सेवा केंद्रांतर्गत स्वयंरोजगार विभागाच्या वतीने महिलांसाठी व युवतींसाठी मोफत परफ्यूम, मेणबत्ती आणि कापडी पिशवी निर्मिती प्रशिक्षण कार्यशाळेचे आयोजन करण्यात आले. ही कार्यशाळा थेरगाव, पिंपरी-चिंचवड येथील श्री स्वामी समर्थ सेवा केंद्रात सकाळी ११ ते सायंकाळी ४ वाजेदरम्यान पार पडली.
कार्यशाळेचे मार्गदर्शन नाशिक शहर स्वयंरोजगार विभागाच्या प्रतिनिधी सौ. शलाका रवींद्र वैष्णव यांनी केले. त्यांनी महिलांना कला, कौशल्य, उद्योगनिर्मिती आणि रोजगाराच्या संधींबाबत सखोल मार्गदर्शन केले. महिलांनी स्वावलंबी बनून घरबसल्या उद्योग सुरू करावा, असे आवाहन त्यांनी यावेळी केले.
या प्रशिक्षणात महिलांना प्रत्यक्ष प्रात्यक्षिकांद्वारे मेणबत्ती, अत्तर, परफ्यूम आणि कापडी पिशवी तयार करण्याचे प्रशिक्षण देण्यात आले. कमी खर्चात, कमी जागेत आणि घरबसल्या व्यवसाय सुरू करण्याच्या विविध संधींबाबत माहिती देण्यात आली. तसेच सोशल मीडिया आणि ऑनलाईन माध्यमातून व्यवसाय वाढविण्याचे मार्गदर्शनही करण्यात आले.
स्वयंरोजगार विभागामार्फत महिलांसाठी विविध कौशल्याधारित प्रशिक्षण कार्यशाळा नियमितपणे आयोजित केल्या जातात. परफ्यूम, मेणबत्त्या, कापडी व कागदी पिशव्या, आकाशदिवे, पणत्या, शाडू मातीचे गणपती अशा वस्तूंच्या निर्मितीचे प्रशिक्षण देऊन महिलांना आर्थिकदृष्ट्या सक्षम करण्याचा प्रयत्न या माध्यमातून केला जात आहे.
कार्यशाळेत सहभागी झालेल्या महिलांना प्रशिक्षण पूर्ण केल्याबद्दल अधिकृत प्रमाणपत्रही देण्यात आले. प्रशिक्षणासाठी आलेल्या महिलांची बेरोजगार नोंदणी देखील करण्यात आली. बाहेरगावाहून आलेल्या महिलांसाठी प्रसादरूपी भोजनाची सुविधा उपलब्ध करून देण्यात आली होती.
या मोफत प्रशिक्षण कार्यशाळेत थेरगावसह रावेत, भोसरी, सांगवी, दिघी तसेच इतर परिसरातील महिलांचा मोठ्या प्रमाणावर सहभाग होता. एकूण १८० महिला व युवतींनी या प्रशिक्षणाचा लाभ घेतला.
कार्यक्रमास थेरगावचे स्वयंरोजगार विभाग प्रतिनिधी श्री. शिवराज भोसले, नाशिकच्या स्वयंरोजगार विभागाच्या प्रतिनिधी सौ. शलाका वैष्णव, दिघीच्या राजश्री देशमुख तसेच विविध सेवा केंद्रांचे प्रतिनिधी, सेवेकरी व भाविक मोठ्या संख्येने उपस्थित होते.
