शहादा, दि. १९ (प्रतिनिधी) :
‘मुख्यमंत्री माझी शाळा सुंदर शाळा’ स्पर्धेत उल्लेखनीय यश संपादन करून तालुक्यात आदर्श ठरलेल्या अक्राणी तालुक्यातील जि.प. शाळा तिसफोडीपाडा (शेलकुवी) येथील शिक्षकांनी पुन्हा एकदा समाजापुढे प्रेरणादायी उदाहरण निर्माण केले आहे. शाळेचा गुणवंत विद्यार्थी सहन मेरसिंग पावरा याच्या पुढील शिक्षणात आर्थिक अडचण येऊ नये म्हणून शिक्षक, शिक्षणप्रेमी आणि ग्रामस्थांनी एकत्र येत त्याला रोख १० हजार ५०० रुपयांची आर्थिक मदत प्रदान केली.
गुणवंत विद्यार्थी सहन पावरा हा धडगाव (अक्राणी) तालुक्यातील बिलगाव हेद्र्यापाडा या अतिदुर्गम भागातील रहिवासी आहे. आजही त्याच्या गावात वीज, रस्ता आणि शिक्षणाच्या मूलभूत सुविधा अपुऱ्या आहेत. कुटुंबाची आर्थिक परिस्थिती अत्यंत हलाखीची असून, आई-वडील रोजंदारी मजुरी करून संसाराचा गाडा चालवतात. अशा प्रतिकूल परिस्थितीतही सहनने शिक्षणाची जिद्द कायम ठेवत आपल्या मेहनतीच्या जोरावर सरस्वती विद्या अकॅडमी, लोणावळा (पुणे) येथे प्रवेश मिळवला असून तेथेही त्याने उल्लेखनीय यश संपादन केले आहे.
सहनच्या या यशाचे कौतुक करत त्याच्या पुढील शैक्षणिक वाटचालीसाठी मदतीचा हात पुढे करण्यात आला. शाळेचे मुख्याध्यापक भगतसिंग पावरा, शिक्षक अशोक ठाकरे, नंदलाल पावरा, पंढरीनाथ धनगर, शिक्षणप्रेमी अभिमान पावरा तसेच शेलकुवी ग्रामपंचायतीचे सरपंच पिंटू पावरा यांनी स्वखर्चातून आर्थिक मदत उभी केली.
यावेळी शाळेत “मुलाबरोबर त्याच्या पालकांचाही गौरव” या विशेष उपक्रमाचे आयोजन करण्यात आले होते. सहनच्या यशाबरोबरच त्याला प्रतिकूल परिस्थितीत शिक्षण देणाऱ्या त्याच्या पालकांच्या संघर्षालाही सन्मानित करण्यात आले. कार्यक्रमाचे अध्यक्ष तथा केंद्रप्रमुख आर. जी. बळसाने यांच्या हस्ते सहनच्या वडिलांचा शाल, श्रीफळ व पुष्पगुच्छ देऊन सत्कार करण्यात आला. तसेच केंद्रप्रमुखांनी सहनला शैक्षणिक साहित्य आणि वैयक्तिक आर्थिक मदतही सुपूर्द केली.
यावेळी बोलताना केंद्रप्रमुख आर. जी. बळसाने म्हणाले, “विद्यार्थ्यांसाठी शाळा ही मातृतुल्य असते. शाळेने दिलेल्या संस्कारांची आणि शिक्षणाची जाणीव ठेवून प्रत्येक विद्यार्थ्याने आपल्या आयुष्याची दिशा निश्चित केली पाहिजे. दुर्गम भागातील विद्यार्थ्यांनी मोठी स्वप्ने पाहून ती पूर्ण करण्यासाठी सातत्याने प्रयत्न केले पाहिजेत.”
या आगळ्यावेगळ्या कार्यक्रमास शेलकुवी व परिसरातील ग्रामस्थ, पालक, विद्यार्थी आणि शिक्षणप्रेमी मोठ्या संख्येने उपस्थित होते. दुर्गम भागातील होतकरू विद्यार्थ्याच्या पाठीशी उभे राहत शिक्षकांनी दाखवलेले दातृत्व आणि पालकांचा केलेला सन्मान सध्या संपूर्ण जिल्ह्यात कौतुकाचा व प्रेरणादायी विषय ठरत आहे.
