शहादा, दि. १९ (प्रतिनिधी) :
येथील पूज्य साने गुरुजी विद्या प्रसारक मंडळाच्या कला, विज्ञान व वाणिज्य कनिष्ठ महाविद्यालय, शहादा (लोणखेडा) येथे राज्य परिवहन महामंडळाच्या शहादा आगारातर्फे कनिष्ठ महाविद्यालयातील विद्यार्थिनींना मोफत बस पासचे वितरण करण्यात आले. शहादा आगाराचे स्थानक प्रमुख पी. जी. पाटील यांच्या हस्ते विद्यार्थिनींना बस पास सुपूर्द करण्यात आले.
कार्यक्रमास कनिष्ठ महाविद्यालयाच्या उपप्राचार्या प्रा. सौ. कल्पना पटेल, आगार स्थानक प्रमुख पी. जी. पाटील, आगार व्यवस्थापक हरीश भोई, वाहतूक नियंत्रक रवींद्र पवार, वाहतूक नियंत्रक नितीन कोळी, प्रा. व्ही. सी. डोळे, प्रा. ए. पी. पाटील, बस पास समितीच्या संयोजिका प्रा. रेखा पाटील, समिती सदस्य प्रा. सविता पाटील, प्रा. मितेश्वरी पाटील, प्रा. योगिता पाटील, प्रा. मधुकर ठाकरे आणि प्रा. शैलेंद्र पाटील उपस्थित होते.
ग्रामीण भागातील विद्यार्थिनींना शिक्षणासाठी शहरात ये-जा करताना आर्थिक अडचणी येऊ नयेत, यासाठी शासनाने ‘मानव विकास मिशन’ तसेच ‘पुण्यश्लोक अहिल्याबाई होळकर मोफत पास योजना’ सुरू केली आहे. या योजनेचा लाभ विद्यार्थिनींपर्यंत सुलभपणे पोहोचावा यासाठी शहादा आगाराच्या अधिकाऱ्यांनी प्रत्यक्ष महाविद्यालयात येऊन पासचे वितरण केले.
यावेळी मार्गदर्शन करताना स्थानक प्रमुख पी. जी. पाटील यांनी सांगितले की, “विद्यार्थी आणि पालकांनी पास काढण्यासाठी आगारात येऊन गर्दी करण्याची किंवा वेळ वाया घालवण्याची गरज नाही. सर्व पास महाविद्यालयातच उपलब्ध करून दिले जातील.”
उपप्राचार्या प्रा. सौ. कल्पना पटेल म्हणाल्या, “शासनाच्या या योजनांमुळे ग्रामीण भागातील मुलींना इयत्ता बारावीपर्यंतचे शिक्षण घेणे अधिक सोपे झाले आहे. परिस्थितीअभावी कोणतीही विद्यार्थिनी शिक्षणापासून वंचित राहू नये, हा या योजनेचा मुख्य उद्देश आहे. मुलींनी उच्च शिक्षण घेऊन आत्मनिर्भर बनणे ही काळाची गरज आहे.”
या उपक्रमाबद्दल पूज्य साने गुरुजी विद्या प्रसारक मंडळाच्या वतीने शहादा आगाराच्या सर्व अधिकारी व कर्मचाऱ्यांचे आभार मानण्यात आले तसेच त्यांच्या कार्यपद्धतीचे कौतुक करण्यात आले.
