आर्वी | प्रतिनिधी वर्धा :
वैशाली एज्युकेशन फाउंडेशन, नागपूरद्वारे संचालित अचिव्हर्स अबॅकस अकॅडमीच्या वतीने दि. १४ जून २०२६ रोजी नागपूर येथील रामगोपाल माहेश्वरी हॉल, सीताबर्डी येथे आयोजित करण्यात आलेल्या नॅशनल लेव्हल अबॅकस कॉम्पिटिशनमध्ये पिंपरी पुनर्वसन (ता. आर्वी) येथील विद्यार्थ्यांनी उल्लेखनीय यश संपादन केले.
या स्पर्धेत देशभरातील मोठ्या संख्येने विद्यार्थ्यांनी सहभाग नोंदविला होता. पद्मावती चौक, आर्वी येथील सौ. प्राजक्ता सुदामा दरोही यांच्या मार्गदर्शनाखाली पिंपरी पुनर्वसन केंद्रातील विद्यार्थी चि. प्रणय निलेश मात्रे याने उत्कृष्ट कामगिरी करत ‘चॅम्पियन’ पुरस्कार पटकावला. त्याला स्मार्टवॉच, मेडल, प्रमाणपत्र आणि ट्रॉफी देऊन गौरविण्यात आले.
तसेच प्रियांश आशिष मांडवे याने आपल्या स्तरात उत्कृष्ट प्रदर्शन करत द्वितीय क्रमांक मिळविला. राजापूर (आर्वी) येथील विद्यार्थी प्रशांत दिनेश ठाकूर यालाही स्पर्धेत चांगली कामगिरी केल्याबद्दल ‘बेस्ट स्टुडंट’ प्रोत्साहन पुरस्कार प्रदान करण्यात आला.
स्पर्धेत मिळालेल्या यशामुळे विद्यार्थी व पालकांमध्ये आनंदाचे वातावरण निर्माण झाले आहे. अबॅकस शिक्षणामुळे विद्यार्थ्यांची गणितावरील भीती दूर होऊन गणित सोडविण्याची क्षमता, आत्मविश्वास आणि बौद्धिक विकास वाढीस लागतो, असे मत अचिव्हर्स अबॅकस अकॅडमी, नागपूरच्या संचालिका सौ. वैशाली अनुप उल्हे यांनी व्यक्त केले. त्यांनी सर्व विद्यार्थी, पालक आणि शिक्षकांचे अभिनंदन केले.
ही नॅशनल लेव्हल स्पर्धा उत्साहपूर्ण वातावरणात पार पडली.
