सेलू प्रतिनिधी :
दि. १८ जून २०२६ रोजी सेलू पोलीस स्टेशनचे ठाणेदार पंकज वाघोडे आणि त्यांच्या पथकाने अवैध गावठी दारू निर्मितीविरोधात मोठी कारवाई करत तब्बल २ लाख ८३ हजार ६०० रुपयांचे साहित्य जप्त करून जागीच नष्ट केले.
पहिली कारवाई शिवारातील स्मशानभूमीजवळ करण्यात आली. येथे पोलिसांना चार लोखंडी ड्रममध्ये प्रत्येकी १८० लिटरप्रमाणे एकूण ७२० लिटर कच्चे मोहा रसायन सापडले. याशिवाय १८ लिटर गावठी मोहा दारू, प्लास्टिक डबकी आणि इतर साहित्य जप्त करण्यात आले. या कारवाईतील मुद्देमालाची किंमत १ लाख ५७ हजार ६०० रुपये इतकी होती. या प्रकरणी आरोपी संदिप उडान (रा. खापरी) याच्याविरुद्ध सेलू पोलीस ठाण्यात गुन्हा दाखल करण्यात आला आहे.
त्यानंतर जयपूर शेतशिवारातील बोर नदीकाठी दुसरी कारवाई करण्यात आली. येथे एका लोखंडी ड्रममध्ये २०० लिटर आणि चार प्लास्टिक ड्रममध्ये ४०० लिटर कच्चा मोहा सडवा मिळून आला. तसेच भट्टीसाठी वापरले जाणारे साहित्यही जप्त करण्यात आले. या कारवाईतील मुद्देमालाची किंमत १ लाख २६ हजार रुपये असल्याचे पोलिसांनी सांगितले.
दोन्ही कारवायांमध्ये मिळून २ लाख ८३ हजार ६०० रुपयांचे गावठी दारू भट्टीचे साहित्य जागीच नष्ट करण्यात आले. या धडक कारवाईमुळे अवैध दारू व्यवसाय करणाऱ्यांमध्ये दहशतीचे वातावरण निर्माण झाले आहे.
ही कारवाई पोलीस अधीक्षक सौरभ कुमार अग्रवाल, अपर पोलीस अधीक्षक सदाशिव वाघमारे आणि उपविभागीय अधिकारी प्रमोद मकेश्वर यांच्या मार्गदर्शनाखाली करण्यात आली. कारवाईत ठाणेदार पंकज वाघोडे यांच्यासह प्रंशात श्रीवास्तव, शरद इंगोले, सचिन वाटखेडे, विनायक गोडे तसेच खापरीच्या पोलीस पाटील नम्रता गव्हाळे यांनी सहभाग घेतला.
