देवळी | प्रतिनिधी :
पोलीस महासंचालक यांच्या आदेशानुसार संपूर्ण महाराष्ट्रात राबविण्यात आलेल्या ‘ऑपरेशन शोध-४’ मोहिमेंतर्गत देवळी पोलिसांनी मिसिंग व अपहरण प्रकरणांमध्ये उल्लेखनीय कामगिरी करत अनेक मुला-मुलींचा शोध लावण्यात यश मिळवले आहे.
दि. ८ जून २०२६ ते २२ जून २०२६ या कालावधीत दाखल असलेल्या मिसिंग व अपहरण प्रकरणांचा आढावा घेऊन देवळी पोलिसांनी विशेष शोधमोहीम राबविली. या मोहिमेदरम्यान मिसिंग क्रमांक १७/२६, २०/२६, २७/२६ आणि ३१/२६ मधील चार मुलींचा शोध घेण्यात आला. तसेच मिसिंग क्रमांक २६/२६ आणि २८/२६ मधील दोन मुलांचाही शोध पोलिसांनी कौशल्याने लावला.
याशिवाय पोलीस स्टेशन देवळी येथील गुन्हा क्रमांक २२८/२६ कलम १३७(२) अंतर्गत १८ वर्षांखालील मुलीचा शोध घेऊन संबंधित आरोपीस ताब्यात घेण्यात आले. कायदेशीर प्रक्रिया पूर्ण करून संबंधित मुलीला तिच्या पालकांच्या ताब्यात देण्यात आले.
तसेच नांदगाव खंडेश्वर (जि. अमरावती) पोलीस स्टेशनच्या गुन्हा क्रमांक ५/२०२६ मधील पीडित मुलीचा शोध घेऊन आरोपीसह तिला ताब्यात घेण्यात आले आणि पुढील कारवाईसाठी नांदगाव खंडेश्वर पोलिसांच्या स्वाधीन करण्यात आले.
या मोहिमेत एकूण सात मुली आणि दोन मुलांचा शोध घेण्यात देवळी पोलिसांना यश आले असून उर्वरित प्रकरणांचाही तपास सुरू असल्याची माहिती ठाणेदार संदीप कापडे यांनी दिली.
ही कारवाई पोलीस अधीक्षक सौरभ अग्रवाल, अपर पोलीस अधीक्षक सदाशिव वाघमारे आणि उपविभागीय पोलीस अधिकारी वंदना खारखेडे यांच्या मार्गदर्शनाखाली ठाणेदार संदीप कापडे, पोलीस उपनिरीक्षक अश्विन गजभिये, शिवराज जाधव तसेच पोलीस कर्मचारी सतीश दरवरे, दुर्गेश बानदे आणि इतर कर्मचाऱ्यांनी केली.
