पाथरी : श्री साईबाबा जन्मस्थान मंदिर, पाथरी येथे २०१७ पासून मुख्य कार्यकारी अधिकारी म्हणून कार्यरत असलेले श्री. एन. के. कुलकर्णी यांना साई स्मारक समिती विश्वस्त मंडळाच्या वतीने सन्मानपूर्वक सेवापूर्ती निरोप देण्यात आला.
श्री. कुलकर्णी हे यापूर्वी श्री साईबाबा संस्थान, शिर्डी येथे अधीक्षक (सामान्य प्रशासन) पदावर कार्यरत होते. शिर्डी संस्थानमधील त्यांच्या प्रदीर्घ अनुभवाचा लाभ पाथरी येथील श्री साईबाबा जन्मस्थान मंदिराला मोठ्या प्रमाणात झाला. तत्कालीन अध्यक्ष कै. सिताराम सोमा धानू यांच्या विनंतीवरून त्यांनी २०१७ मध्ये पाथरी येथे मुख्य कार्यकारी अधिकारी म्हणून कार्यभार स्वीकारला.
आपल्या कार्यकाळात त्यांनी मंदिरातील आस्थापना व्यवस्थापन, सेवेकऱ्यांचे कामकाज नियोजन, प्रशासनातील शिस्त आणि विविध सकारात्मक बदल घडवून आणले. तसेच देशभरातील साई भक्तांशी असलेल्या संपर्कातून श्री साईबाबांच्या जन्मस्थानाविषयीची माहिती अधिकाधिक भक्तांपर्यंत पोहोचविण्याचे महत्त्वपूर्ण कार्य केले.
अलीकडेच त्यांची अँजिओप्लास्टी तसेच डोळ्यांची शस्त्रक्रिया झाल्याने वय आणि प्रकृतीच्या कारणास्तव त्यांनी आपल्या पदाचा राजीनामा दिला. साई स्मारक समितीने त्यांचा राजीनामा आदरपूर्वक स्वीकारत त्यांच्या सेवेला गौरवपूर्ण निरोप दिला.
त्यांच्या पत्नी सौ. छाया कुलकर्णी यांनीही मंदिरातील नैवेद्य व्यवस्था आणि प्रशासनात महत्त्वपूर्ण मार्गदर्शन केले. त्यांनी काही काळ मंदिर अधीक्षक म्हणूनही जबाबदारी सांभाळली. त्यांच्या मुलगा साईप्रसाद यांच्यासह संपूर्ण कुलकर्णी कुटुंबावर साईबाबांची विशेष कृपा असल्याची भावना यावेळी व्यक्त करण्यात आली.
साई स्मारक समिती ट्रस्ट, पाथरीच्या वतीने अध्यक्ष श्री. सुभाष दळी यांच्या हस्ते श्री. एन. के. कुलकर्णी, सौ. छाया कुलकर्णी आणि साईप्रसाद कुलकर्णी यांचा शाल, श्रीफळ व साईबाबांच्या आशीर्वाद स्वरूप भेटवस्तू देऊन सत्कार करण्यात आला.
या प्रसंगी व्यवस्थापकीय विश्वस्त ॲड. अतुल चौधरी, विश्वस्त श्री. सांगडे, श्री. कालिदास चौधरी, श्री. संजय भुसारी, मुख्य कार्यकारी अधिकारी श्री. मुकुंदराव चौधरी तसेच मंदिरातील सेवेकरी मोठ्या संख्येने उपस्थित होते.
