विटेकर, गुट्टे यांच्या नावाचा उल्लेख टाळल्याने राजकीय चर्चांना उधाण
परभणी | प्रतिनिधी :
परभणी-हिंगोली स्थानिक स्वराज्य संस्था विधान परिषद निवडणुकीत महायुतीचे उमेदवार सईद खान यांनी दणदणीत विजय मिळवल्यानंतर आयोजित पत्रकार परिषद आणि जाहीर आभार कार्यक्रमात त्यांनी महायुतीतील विविध नेते, पदाधिकारी आणि कार्यकर्त्यांचे आभार मानले. मात्र, या विजयी भाषणात महायुतीतील महत्त्वाचे नेते आमदार राजेश विटेकर आणि आमदार रत्नाकर गुट्टे यांच्या नावाचा उल्लेख टाळण्यात आल्याने जिल्ह्याच्या राजकीय वर्तुळात चर्चांना उधाण आले आहे.
नेत्यांच्या नावांच्या ‘वगळणी’ची चर्चा
निवडणुकीच्या काळात महायुतीमध्ये अंतर्गत नाराजी असल्याच्या चर्चा राजकीय वर्तुळात सुरू होत्या. सईद खान यांनी आपल्या भाषणात अनेक प्रमुख नेत्यांचे आभार मानले, मात्र राष्ट्रवादी काँग्रेस (अजित पवार गट) चे आमदार राजेश विटेकर आणि रासपचे आमदार रत्नाकर गुट्टे यांच्या नावाचा उल्लेख न केल्याने अनेक तर्कवितर्कांना उधाण आले आहे.
ही बाब केवळ दुर्लक्ष होती की त्यामागे काही राजकीय संदेश दडलेला होता, याबाबत राजकीय वर्तुळात चर्चा सुरू आहेत.
महायुतीची सर्व मते मिळाली का?
याच पार्श्वभूमीवर महायुतीची सर्व मते सईद खान यांच्या पारड्यात पडली का, याबाबतही चर्चा रंगू लागल्या आहेत. सूत्रांकडून मिळालेल्या माहितीनुसार, मतदानाच्या आकडेवारीनंतर काही मतांमध्ये तफावत असल्याची शक्यता वर्तवली जात आहे.
काही स्थानिक नेत्यांकडून खासगीत ‘क्रॉस व्होटिंग’ झाल्याच्या चर्चाही केल्या जात आहेत. या संभाव्य नाराजीमुळेच संबंधित आमदारांची नावे भाषणातून वगळली गेली असावीत, असा अंदाज राजकीय विश्लेषक व्यक्त करत आहेत.
सईद खान यांच्या विजयानंतर परभणी आणि हिंगोली जिल्ह्यात महायुतीच्या कार्यकर्त्यांनी फटाके फोडून आणि गुलाल उधळून आनंदोत्सव साजरा केला. मात्र, या जल्लोषात काही प्रमुख नेत्यांची भूमिका आणि त्यांच्या समर्थकांची शांतता अनेकांच्या चर्चेचा विषय ठरली.
राजकीय जाणकारांच्या मते, “विजय मिळाला असला तरी महायुतीमधील अंतर्गत समन्वय पूर्णपणे सुरळीत नसल्याचे संकेत या संपूर्ण घडामोडीतून दिसून येत आहेत. आगामी निवडणुकांच्या पार्श्वभूमीवर हा दुरावा महायुतीसाठी कितपत परिणामकारक ठरेल, हे पाहणे महत्त्वाचे ठरणार आहे.”
या संपूर्ण प्रकरणावर आता आमदार राजेश विटेकर आणि आमदार रत्नाकर गुट्टे यांची प्रतिक्रिया काय येते, याकडे सर्वांचे लक्ष लागले आहे.
