वर्धा प्रतिनिधी :
वर्धा, दि. 21 जून 2026 : अनैतिक मानवी वाहतूक प्रतिबंधक कक्ष, वर्धा यांच्या पथकाने सावंगी (मेघे) परिसरात सुरू असलेल्या अनैतिक देहव्यापारावर धाड टाकून कारवाई केली. या कारवाईत एका पीडित महिलेची सुटका करण्यात आली असून एकूण 38 हजार रुपयांचा मुद्देमाल जप्त करण्यात आला आहे.
पोलिसांनी दिलेल्या माहितीनुसार, सावंगी (मेघे) येथील कृष्णाई कोर्ट बिल्डिंगमधील एका फ्लॅटमध्ये अनैतिक देहव्यापार सुरू असल्याची गोपनीय माहिती पोलिसांना मिळाली होती. त्यानुसार 20 जून रोजी सायंकाळी 5.50 ते 7.50 वाजेदरम्यान छापा टाकण्यात आला.
या कारवाईत आरोपी मुस्कान उर्फ शबनम (रा. सावंगी मेघे, सध्या फरार) तसेच राजू उर्फ निलेश प्रदीपराव आदेवार (वय 21 वर्षे, रा. तुकाराम वॉर्ड, रामनगर, वर्धा) यांच्याविरुद्ध गुन्हा दाखल करण्यात आला आहे.
कारवाईदरम्यान पोलिसांनी रोख 8 हजार रुपये तसेच 30 हजार रुपये किमतीचे तीन अँड्रॉइड मोबाईल फोन असा एकूण 38 हजार रुपयांचा मुद्देमाल जप्त केला. तसेच पीडित महिलेची सुटका करून तिला आवश्यक संरक्षण व मदत उपलब्ध करून देण्यात आली.
या प्रकरणी सावंगी (मेघे) पोलीस स्टेशनमध्ये अप. क्र. 496/2026 अन्वये कलम 143(2) बीएनएस तसेच अनैतिक मानवी व्यापार प्रतिबंधक अधिनियम 1956 च्या कलम 3, 4, 5 व 7 अंतर्गत गुन्हा नोंदविण्यात आला आहे.
पुढील तपास सावंगी (मेघे) पोलीस स्टेशनमार्फत सुरू असून फरार आरोपीचा शोध घेण्यात येत आहे.
