विराथन बुद्रुक :
मेघराज शिक्षण संस्थेच्या अभिनव विद्यालय, विराथन बुद्रुक येथे स्टेट बँक ऑफ इंडिया, सफाळे शाखेच्या सौजन्याने गरीब व गरजू विद्यार्थिनींना सायकल वाटप कार्यक्रम उत्साहात पार पडला.
ग्रामीण भागातील विद्यार्थिनींना शाळेत ये-जा करण्यासाठी सुलभता मिळावी, प्रवासाचा वेळ वाचावा तसेच शिक्षणासाठी प्रोत्साहन मिळावे या उद्देशाने हा उपक्रम राबविण्यात आला. कार्यक्रमात संस्थेचे कार्यवाह चंदुलाल घरत सर, बँकेचे समन्वयक राहुल पाटील, समाजसेवक राजन घरत आणि जगदीश किणी यांच्या हस्ते विद्यार्थिनींना सायकलींचे वितरण करण्यात आले.
यावेळी उपस्थित मान्यवरांनी विद्यार्थ्यांना शिक्षणाचे महत्त्व पटवून देत नियमित शाळेत उपस्थित राहण्याचे आवाहन केले. ग्रामीण विद्यार्थ्यांच्या शैक्षणिक प्रगतीसाठी सामाजिक बांधिलकी जपत स्टेट बँक ऑफ इंडियाने राबविलेल्या या उपक्रमाचे सर्व स्तरातून कौतुक करण्यात आले.
विद्यालयाचे शिक्षक महेंद्र पाटील यांनी विशेष पाठपुरावा करून १८ विद्यार्थिनींना सायकली उपलब्ध करून दिल्या. शाळेचे मुख्याध्यापक बाबुराव भोईर, शिक्षक वैभव पाटील, पालक आणि विद्यार्थ्यांनी स्टेट बँक ऑफ इंडिया, सफाळे शाखेचे मनःपूर्वक आभार व्यक्त केले.
सायकल मिळाल्याने विद्यार्थिनींमध्ये आनंदाचे वातावरण निर्माण झाले असून त्यांच्या शिक्षणाच्या प्रवासाला नवी गती मिळणार असल्याची भावना विद्यार्थिनींनी व्यक्त केली.
