नेवासा| प्रतिनिधी
सुरेगाव गंगा परिसरात बिबट्याचा वावर वाढल्याने नागरिकांमध्ये भीतीचे वातावरण निर्माण झाले आहे. दि. २४ जून २०२६ रोजी रात्री बिबट्याने थेट गावात व वस्त्यांवर प्रवेश करून जनावरांवर हल्ले केल्याची घटना घडली.
मिळालेल्या माहितीनुसार, रात्री सुमारे ८ वाजण्याच्या सुमारास बोरगाव शिवार रोड परिसरात बिबट्याचे दर्शन झाले. त्यानंतर रात्री १० वाजता शेवंता अक्का यांच्या वस्तीवरील जनावरांवर बिबट्याने हल्ला केला.
यानंतर रात्री ११ वाजता गावातील मारुती मंदिर परिसरातही बिबट्या दिसून आला. तर मध्यरात्री १२ वाजण्याच्या सुमारास गावातील चांगदेव विठ्ठल औटी यांच्या शेळीवर बिबट्याने हल्ला केला.
गावातील वस्तीवरील नागरिकांनी आरडाओरडा केल्याने बिबट्या जंगलाच्या दिशेने पळून गेला. मात्र या हल्ल्यात शेवंता अक्का यांच्या वस्तीवरील कालवड जखमी झाली असून चांगदेव विठ्ठल औटी यांची शेळीही गंभीर जखमी झाली आहे. जखमी जनावरांवर उपचार सुरू आहेत.
या घटनेनंतर परिसरातील नागरिकांमध्ये भीतीचे वातावरण पसरले असून वनविभागाने तातडीने उपाययोजना करून बिबट्याचा बंदोबस्त करावा, अशी मागणी ग्रामस्थांकडून करण्यात येत आहे.
