२७ जून रोजी किनवट येथे शिबिराचे आयोजन
किनवट | प्रतिनिधी
किनवट येथील जिल्हा परिषद (मुलांचे) हायस्कूलमध्ये शनिवार, २७ जून रोजी अस्थिव्यंग दिव्यांग व्यक्तींसाठी कृत्रिम अवयव वितरण शिबिराचे आयोजन करण्यात आले असून जास्तीत जास्त गरजू दिव्यांग बांधवांनी या शिबिराचा लाभ घ्यावा, असे आवाहन परिविक्षाधीन उपशिक्षणाधिकारी तथा गट शिक्षणाधिकारी निळकंठ चेटले यांनी केले आहे.
महाराष्ट्र शासनाच्या दिव्यांग कल्याण विभागाचे सहाय्यक आयुक्त, दिव्यांग सक्षमीकरण कार्यालय, जिल्हा परिषद नांदेड यांच्या मार्गदर्शनाखाली एस.आर. ट्रस्ट, मध्यप्रदेश आणि ALIMCO, मुंबई यांच्या संयुक्त विद्यमाने “ऑन द स्पॉट” मोजमाप व तात्काळ वितरणासाठी हे विशेष शिबिर आयोजित करण्यात आले आहे.
या शिबिरामध्ये नांदेड जिल्ह्यातील किनवट तालुक्यातील अस्थिव्यंग दिव्यांग व्यक्तींना कृत्रिम हात-पाय, कॅलिपर्स तसेच इतर आवश्यक साहित्याचे मोजमाप घेऊन तात्काळ वितरण करण्यात येणार आहे.
शिबिरात टोंगळ्याखालील व वरच्या भागासाठी कृत्रिम पाय, मनगट किंवा खांद्यापासून कट झालेल्यांसाठी कृत्रिम हात, पायाचे सिलम (प्लास्टिक पट्टा), कॅलिपर्स तसेच दैनंदिन वापरासाठी स्पोर्ट्स बूट उपलब्ध करून देण्यात येणार आहेत.
हे शिबिर शनिवार, २७ जून २०२६ रोजी सकाळी १० ते सायंकाळी ६ वाजेपर्यंत जिल्हा परिषद (मुलांचे) हायस्कूल, किनवट येथे होणार आहे.
दिव्यांग सक्षमीकरण कार्यालय नांदेडचे सहाय्यक आयुक्त अवधूत गंजेवार यांच्या मार्गदर्शनाखाली मुख्याध्यापक प्रदीप कांबळे, महादेव वायकुळे, शेख अन्सार, अंकुश आडेराव आणि व्यवस्थापकीय अधीक्षक प्रमोद बागवाले हे शिबिराच्या यशस्वीतेसाठी परिश्रम घेत आहेत.
या शिबिरासाठी येताना लाभार्थींनी आधार कार्ड, रेशन कार्ड, वैद्यकीय प्रमाणपत्र आणि UDID कार्ड ही आवश्यक कागदपत्रे सोबत आणावीत, असे आवाहनही निळकंठ चेटले यांनी केले आहे.
