तीन महिने गैरहजर राहून गावकऱ्यांना धमकी दिल्याचा आरोप; आंदोलनाचा इशारा
धडगाव | प्रतिनिधी
पिंपर्डे (ता. शहादा, जि. नंदुरबार) येथील ग्रामसेविका दिपिका अरविंद उगलमुगले या गेल्या तीन महिन्यांपासून ग्रामपंचायत कार्यालयात अनुपस्थित राहत असून गावकऱ्यांचे प्रश्न सोडविण्याकडे दुर्लक्ष करत असल्याचा गंभीर आरोप ग्रामस्थांनी केला आहे. तसेच कर्मचाऱ्यांना धमकी देणे, गैरवर्तन करणे आणि जबाबदारी झटकण्याच्या प्रकारामुळे संतप्त ग्रामस्थांनी त्यांना तात्काळ निलंबित करण्याची मागणी केली आहे.
यासंदर्भात बिरसा फायटर्स संघटनेच्या वतीने गटविकास अधिकारी, पंचायत समिती शहादा यांना निवेदन देण्यात आले असून, मागणी मान्य न झाल्यास तीव्र आंदोलन छेडण्याचा इशाराही देण्यात आला आहे.
निवेदन देताना बिरसा फायटर्सचे राज्याध्यक्ष गोपाल भंडारी, कोषाध्यक्ष पप्पू अवाया, जगदीश डुडवे, विजय पावरा, दिनेश वाघ, गंगाधर पवार, शरद पवार, श्रावण वाघ, ईश्वर भील, एकनाथ पावरा, राहूल वाघ, प्रविण ईशी, सागर वाघ, सागर पावरा यांच्यासह अनेक कार्यकर्ते उपस्थित होते.
निवेदनात म्हटले आहे की, ग्रामसेवक हा शासन आणि गावकरी यांच्यातील महत्त्वाचा दुवा असून महसूल वसुली, शासकीय योजना राबविणे, जन्म-मृत्यू नोंदी ठेवणे, विविध दाखले देणे तसेच ग्रामसभेतील प्रश्न सोडविणे यांसारखी जबाबदारी ग्रामसेवकावर असते. मात्र, ग्रामसेविका दिपिका उगलमुगले या गेल्या तीन महिन्यांपासून कार्यालयात येत नसल्याचा आरोप करण्यात आला आहे.
याशिवाय ग्रामपंचायत कार्यालयात नियमितपणे काम करणारे शिपाई दिनेश वाघ यांच्यावर खोटे आरोप करून त्यांना धमक्या दिल्याचा आरोपही ग्रामस्थांनी केला आहे. “तू समोर भेट फक्त आता दाखवते तुला, तू विचार करून ठेव आता,” असा धमकीचा संदेश व्हॉट्सअॅपवर पाठविल्याचा आरोप करण्यात आला आहे.
उपसरपंच घनश्याम मराठे यांनी ग्रामसेविका उगलमुगले या गावकऱ्यांशी व कर्मचाऱ्यांशी उद्धटपणे वागत असून कर्तव्यात कसूर करत असल्याचा आरोप केला. हे वर्तन ग्रामसेवक पदाला अशोभनीय असून ग्रामपंचायतीच्या हिताचे नसल्याचेही त्यांनी म्हटले आहे.
ग्रामस्थांनी प्रशासनाने या प्रकरणाची चौकशी करून संबंधित ग्रामसेविकेवर तातडीने कारवाई करावी, अशी मागणी केली आहे.
