श्रीगोंदा : प्रतिनिधी
श्रीगोंदा तालुक्यातील घोडेगाव येथे शेतात वडिलांसोबत काम करीत असताना अचानक अंगावर वीज पडल्याने २२ वर्षीय तरुणाचा दुर्दैवी मृत्यू झाल्याची घटना आज दुपारी घडली. या घटनेमुळे संपूर्ण परिसरात हळहळ व्यक्त होत आहे.
मिळालेल्या माहितीनुसार, घोडेगाव (ता. श्रीगोंदा) येथील अभिषेक रुपचंद दरेकर हा आज दुपारी सुमारे चार वाजण्याच्या सुमारास आपल्या वडिलांसोबत शेतात काम करीत होता. दरम्यान, अचानक हवामानात बदल होऊन विजांच्या कडकडाटासह पावसाला सुरुवात झाली.
याच वेळी अचानक अभिषेकच्या अंगावर वीज कोसळली. वीजेचा धक्का अत्यंत तीव्र असल्याने त्याला तातडीने दवाखान्यात नेण्यात आले. मात्र उपचारापूर्वीच त्याचा मृत्यू झाल्याचे डॉक्टरांनी घोषित केले.
वडिलांसमोरच तरुण मुलाचा झालेला दुर्दैवी मृत्यू दरेकर कुटुंबासाठी मोठा धक्का ठरला असून, कुटुंबावर दुःखाचा डोंगर कोसळला आहे.
घटनेची माहिती मिळताच ग्रामस्थांनी घटनास्थळी धाव घेतली. या घटनेमुळे घोडेगाव परिसरात शोककळा पसरली असून, पीडित कुटुंबाला शासनाकडून आर्थिक मदत देण्यात यावी, अशी मागणी नागरिकांकडून करण्यात येत आहे.
