श्रीगोंदा : प्रतिनिधी
मोहरम पर्वानिमित्त ताजिया स्थापनेची परंपरा जपली जात असून, श्रीगोंदा येथील शेख महंमद बाबा दर्गाह येथे पारंपरिक पद्धतीने ताजिया (ताबुत) स्थापना करण्यात आली आहे.
छत्रपती शिवाजी महाराज यांचे आजोबा श्रीमंत मालोजीराजे भोसले यांचे गुरू म्हणून ओळखले जाणारे सुफी संत शेख महंमद बाबा यांच्या दर्गाहमध्ये ही परंपरा अनेक वर्षांपासून सुरू आहे. शेख महंमद बाबा यांच्या वंशजांकडून ही धार्मिक परंपरा जतन केली जात असून, यंदाही दि. १७ जून २०२६ रोजी पारंपरिक रुढी-परंपरेनुसार ताजियाची स्थापना करण्यात आली.
श्रीगोंदा शहरासह तालुक्यातील विविध भागांतही ताजिया, सवारी आणि पंजाची स्थापना करण्यात आली आहे. यामध्ये जावेद फकीर, राजू मनियार, बाळासाहेब गोरे, बादशहा मालजप्ते, महंमद शेख, डॉ. बन्सीभाई मनियार आदींचा सहभाग आहे.
शुक्रवार, दि. २६ जून २०२६ रोजी ताजियाचे विसर्जन करण्यात येणार असून, रविवार दि. २८ जून रोजी ‘तिजायत’ निमित्त शेख महंमद बाबा दरबारात खिचाडा महाप्रसादाचे आयोजन करण्यात आले आहे. या महाप्रसादाचा भाविकांनी मोठ्या संख्येने लाभ घ्यावा, असे आवाहन शेख महंमद बाबा ट्रस्टचे अध्यक्ष तथा शेख महंमद बाबा यांचे वंशज नगरसेवक आमीनभाई शेख यांनी केले आहे.
चौकट
मोहरम उत्सवासाठी दौलतराव शिंदे घराण्याकडून निधी
मोहरम निमित्त शेख महंमद बाबा दरबारात ताजिया (ताबुत) स्थापना केली जाते. या उत्सवासाठी पूर्वीपासून दौलतराव शिंदे घराण्याकडून निधी दिला जात असल्याची सनद उपलब्ध असल्याचे सांगण्यात येते. दरवर्षी मोहरमच्या निमित्ताने येथे दहा दिवस मोठ्या प्रमाणात सर्वधर्मीयांच्या सहभागातून उत्सव साजरा केला जातो.
