जळकोट प्रतिनिधी :
मोहरम निमित्त जळकोट शहरात यावर्षीही मोठ्या उत्साहात आणि भक्तिमय वातावरणात उत्सव साजरा करण्यात येत आहे. दरवर्षीप्रमाणे यंदाही शहरातील विविध भागांमध्ये सवाऱ्या आणि ताजिया मोठ्या प्रमाणात बसविण्यात आले आहेत.
जळकोट शहरातील “दरना साहेब” आणि “लाल साहेब” या प्रमुख सवाऱ्यांना भाविकांकडून मोठी गर्दी होत असून परिसरात अध्यात्मिक आणि उत्साहाचे वातावरण निर्माण झाले आहे. मोहरम उत्सवाच्या माध्यमातून सर्वधर्मीय बांधवांनी एकतेचा आणि बंधुभावाचा संदेश दिला.
यावेळी उपस्थित मान्यवरांनी समाजात भक्ती, सदाचार, सामाजिक ऐक्य आणि परस्पर प्रेम कायम टिकून राहावे, असे आवाहन केले. “प्रत्येक गावात सर्वधर्मीय एकोपा आणि सामाजिक सलोखा वाढीस लागला पाहिजे,” असा संदेशही देण्यात आला.
मोहरम उत्सवानिमित्त जळकोट तालुक्यातील लोहार गल्ली, मोमीन गल्ली, मुला सवारी आदी भागांमध्येही मोठ्या प्रमाणात सवाऱ्या बसविण्यात आल्या आहेत.
या उत्सवात तरुण, ज्येष्ठ नागरिक तसेच सर्वधर्मीय नागरिक मोठ्या संख्येने सहभागी झाले होते.
