प्रतिनिधी :
भुसावळ विभागातील ओढा रेल्वे स्थानक परिसरात मानवतेचा प्रत्यय देणारी घटना समोर आली आहे. स्थानक परिसरात उभ्या असलेल्या मालगाडीच्या १३ क्रमांकाच्या डब्यात एका नवजात बालिकेला कपड्यात गुंडाळून सोडून देण्यात आल्याचे आढळून आले. रेल्वे संरक्षण दल (RPF) आणि एमएसएफ (MSF) जवानांच्या सतर्कतेमुळे या चिमुकलीचे प्राण वाचले.
मिळालेल्या माहितीनुसार, रविवारी पहाटे नियमित गस्तीदरम्यान आरपीएफ कॉन्स्टेबल योगेश गावड आणि एमएसएफ कर्मचारी प्रशांत जगताप हे मालगाडीची तपासणी करत होते. पहाटे सुमारे २.४५ वाजण्याच्या सुमारास एका डब्यातून नवजात बालिकेच्या रडण्याचा आवाज त्यांना ऐकू आला. आवाजाच्या दिशेने शोध घेतल्यानंतर मालगाडीच्या डब्यात कपड्यात गुंडाळलेल्या अवस्थेत नवजात बालिका आढळून आली.
यानंतर जवानांनी तत्काळ रेल्वेचे वरिष्ठ अधिकारी, जीआरपी तसेच चाईल्डलाईन प्रतिनिधींना माहिती दिली. बालिकेला सुरक्षित बाहेर काढून तातडीने भुसावळ येथील शासकीय रुग्णालयात दाखल करण्यात आले. डॉक्टरांनी प्राथमिक तपासणीनंतर बालिकेची प्रकृती स्थिर असल्याचे सांगितले.
रेल्वे सुरक्षा दलाच्या “ऑपरेशन जीवन रक्षा” अंतर्गत करण्यात आलेल्या या उल्लेखनीय कार्यामुळे रेल्वे कर्मचाऱ्यांच्या तत्परता, सतर्कता आणि कर्तव्यनिष्ठेचे सर्वत्र कौतुक होत आहे.
दरम्यान, नवजात बालिकेला अशा अमानुष पद्धतीने मालगाडीच्या डब्यात कोण आणि का सोडून गेले, याचा शोध रेल्वे पोलीस आणि संबंधित यंत्रणांकडून सुरू असून सीसीटीव्ही फुटेज व अन्य पुराव्यांच्या आधारे तपास केला जात आहे.
आरपीएफचे कॉन्स्टेबल योगेश गावड आणि एमएसएफ कर्मचारी प्रशांत जगताप यांनी दाखविलेल्या मानवतावादी कार्यामुळे एका निष्पाप चिमुकलीचे प्राण वाचले असून त्यांच्या कार्याचे सर्व स्तरांतून कौतुक केले जात आहे.
