विकासकामांवर चर्चा; सत्ताधारी-विरोधकांमध्ये शाब्दिक चकमक
प्रतिनिधी :
कुरुंदवाड : येथील नगरपरिषदेच्या छत्रपती शिवाजी महाराज सभागृहात सोमवार, दि. २९ जून २०२६ रोजी सकाळी ११.३० वाजता आयोजित करण्यात आलेल्या सर्वसाधारण सभेत विकासाभिमुख १२ विषयांना मंजुरी देण्यात आली. मात्र काही विषयांवरून सत्ताधारी आणि विरोधक यांच्यात शाब्दिक चकमकही झाली.
नगराध्यक्षा मनिषा डांगे यांच्या अध्यक्षतेखाली झालेल्या या सभेस मुख्याधिकारी मनोजकुमार देसाई, उपनगराध्यक्ष दीपक गायकवाड, बांधकाम अभियंता राजेंद्र गवळी, नगरसेवक, नगरसेविका तसेच पालिकेचे अधिकारी उपस्थित होते.
सभेमध्ये कुरुंदवाड नगरपरिषदेकडील जन्म-मृत्यू नोंदवहीचे डिजिटल स्कॅनिंग व बाइंडिंग करण्याबाबत चर्चा करण्यात आली. तसेच सन्मित्र चौक येथील नागरी आरोग्यवर्धिनी केंद्रासाठी जनआरोग्य समिती स्थापन करण्याच्या विषयावरही विचारविनिमय झाला.
सन २०२६-२७ या आर्थिक वर्षासाठी विद्युत विभागातील वार्षिक साहित्य पुरवठा, मजुरी कामे, संगणक, प्रिंटर, स्कॅनर खरेदी व देखभाल कामांना मंजुरी देण्यात आली. प्रभाग क्रमांक १० मधील मोहन गॅरेजसमोरील रस्त्यावर क्रॉस पाइप टाकण्याच्या कामालाही मान्यता देण्यात आली.
सभेत श्री शिवस्मारक टप्पा ३, ४ व ५ अंतर्गत चबुतऱ्याचे भरावासह बांधकाम, विद्युतीकरण, लिफ्ट बसविणे तसेच परिसरात त्रिमिती भित्तीचित्रे उभारण्याच्या विषयांवर चर्चा झाली. यासोबतच मटण मार्केटमधील सांडपाणी निचरा करण्यासंबंधीच्या कामालाही मंजुरी देण्यात आली.
शहराच्या विकासासाठी महत्त्वपूर्ण असलेल्या विविध विषयांना सभेत मंजुरी देण्यात आली. दरम्यान, आयत्या वेळच्या विषयामध्ये क्रीडा स्पर्धा आयोजित करण्यासाठी निधी मंजूर करण्याच्या मुद्द्यावरून विरोधक आणि सत्ताधाऱ्यांमध्ये शाब्दिक चकमक झाली.
या सभेस नगरसेवक रमेश भुजूगडे, जवाहर पाटील, अक्षय आलासे, वैभव उगळे, शुभम जोंग, अलका पाटील, संगीता कर्नाळे, जुबेरिया गोलंदाज, सुनंदा आलासे, विमल पोमाजे, रुकसाना बागवान, आयेशा बागवान, अलका मधाळे, विजय पाटील, तानाजी आलासे, विशाल पाटील, प्रदीप चव्हाण, दीपक परिट, सुजाता जाधव आदी उपस्थित होते.
सभेच्या सुरुवातीला विषयपत्रिकेचे वाचन नंदकुमार चौधरी यांनी केले.
