श्रीरामपूर (प्रतिनिधी) : श्रीरामपूर तालुका क्रीडा संकुलासाठी ऐनतपूर येथील महाराष्ट्र राज्य शेती महामंडळाची जमीन देण्यास मान्यता देण्यात आली असून त्यानुसार पुढील कार्यवाही करण्याचे निर्देश जिल्हाधिकाऱ्यांनी दिले आहेत.
या संदर्भात आमदार हेमंत ओगले, नगराध्यक्ष करण ससाणे, सभापती सुधीर नवले आदींनी राज्याचे महसूलमंत्री चंद्रशेखर बावनकुळे यांची भेट घेतली. यावेळी मतदारसंघातील शेती महामंडळाच्या जमीन वाटपासह विविध विकासकामांबाबत महत्त्वपूर्ण बैठक पार पडली.
बैठकीदरम्यान मागासवर्गीय मुलींच्या वस्तीगृहासाठी महाराष्ट्र राज्य शेती महामंडळाची जमीन देण्यास मान्यता देण्यात आली. तसेच कृषी उत्पन्न बाजार समितीसाठी आवश्यक जमीन उपलब्ध करून देण्यासही मंजुरी देण्यात आली आहे.
याशिवाय प्रस्तावित शासकीय उद्यान आणि शासकीय अभियांत्रिकी महाविद्यालयासाठीही महाराष्ट्र राज्य शेती महामंडळाची जमीन उपलब्ध करून देण्यास मान्यता मिळाल्याची माहिती आमदार हेमंत ओगले यांनी दिली.
या निर्णयांमुळे श्रीरामपूर तालुक्यातील क्रीडा, शिक्षण आणि सामाजिक विकासाच्या विविध प्रकल्पांना मोठी चालना मिळणार असल्याचे मत नागरिकांकडून व्यक्त करण्यात येत आहे.
