किनवट तालुक्यात गॅस सिलिंडरचा तीव्र तुटवडा; ग्राहकांना तासन्तास रांगेत उभे राहण्याची वेळ

नांदेड प्रतिनिधी

नांदेड जिल्ह्यातील किनवट तालुक्यात घरगुती एलपीजी (HP) गॅस सिलिंडरचा तीव्र तुटवडा निर्माण झाल्याने नागरिकांचे मोठे हाल होत आहेत. सिलिंडर मिळविण्यासाठी महिला, ज्येष्ठ नागरिक तसेच सर्वसामान्य ग्राहकांना गॅस एजन्सीसमोर तासन्तास रांगेत उभे राहावे लागत असूनही अनेकांना रिकाम्या हाताने परत जावे लागत असल्याचे चित्र पाहायला मिळत आहे.

आज सकाळपासूनच गॅस एजन्सीसमोर ग्राहकांची मोठी गर्दी झाली होती. अनेक नागरिक रिकामे सिलिंडर घेऊन पहाटेपासूनच रांगेत उभे होते. मात्र, पुरेसा गॅस साठा उपलब्ध नसल्याने अनेकांना प्रतीक्षा करावी लागली. त्यामुळे ग्राहकांमध्ये तीव्र नाराजी व्यक्त होत आहे.

ग्रामीण भागातील ग्राहकांची परिस्थिती अधिक गंभीर बनली असून त्यांना वारंवार एजन्सीच्या फेऱ्या माराव्या लागत आहेत. पावसाळ्याच्या दिवसांत लाकूडफाटा सहज उपलब्ध नसल्याने स्वयंपाकासाठी गॅसवर अवलंबून असलेल्या कुटुंबांना मोठा त्रास सहन करावा लागत आहे.

ग्राहकांच्या म्हणण्यानुसार, नियमित ऑनलाइन बुकिंग करूनही वेळेत सिलिंडर मिळत नसल्याने दैनंदिन जीवन विस्कळीत झाले आहे. पुरवठा सुरळीत नसल्यामुळे एजन्सीसमोर दररोज गर्दी होत असून नागरिकांचा वेळ आणि आर्थिक खर्च दोन्ही वाढत आहेत.

दरम्यान, संबंधित गॅस वितरक आणि पुरवठा विभागाने या तुटवड्याची तातडीने दखल घेऊन अतिरिक्त गॅस सिलिंडरचा पुरवठा करावा, वितरण व्यवस्था पारदर्शक करावी आणि ग्रामीण भागातही वेळेत गॅस उपलब्ध करून द्यावा, अशी मागणी नागरिकांकडून करण्यात येत आहे.

स्थानिक प्रशासनानेही या प्रश्नात लक्ष घालून गॅस पुरवठा नियमित करण्यासाठी तातडीने उपाययोजना कराव्यात, अन्यथा नागरिकांच्या रोषाला सामोरे जावे लागू शकते, अशी प्रतिक्रिया ग्राहकांकडून व्यक्त करण्यात येत आहे.