शहादा : शहादा नगरपरिषदेची अत्यंत महत्त्वपूर्ण सर्वसाधारण सभा गुरुवारी दि. २ रोजी दुपारी ३ वाजता नगरपालिका सभागृहात पार पडली. नगराध्यक्ष अभिजीत पाटील यांच्या अध्यक्षतेखाली झालेल्या या सभेला उपनगराध्यक्ष सौ. माधवी मकरंद पाटील, मुख्याधिकारी साजिद पिंजारी यांच्यासह सत्ताधारी व विरोधी पक्षाचे नगरसेवक आणि विविध विषय समित्यांचे सभापती उपस्थित होते.
शहराच्या दृष्टीने महत्त्वाच्या अनेक विकासकामांवर सभेत सविस्तर चर्चा करण्यात आली. सभेच्या सुरुवातीला विषय क्रमांक १ अंतर्गत मागील सभेचे इतिवृत्त वाचून कायम करण्यात आले. यावेळी नगरसेवक हरीश पाटील आणि ज्ञानेश्वर चौधरी यांनी मिनिट बुकमध्ये अचूक नोंदी करण्याची मागणी करत आक्रमक भूमिका घेतली. यावर नगराध्यक्ष अभिजीत पाटील यांनी संबंधित मागणीची गांभीर्याने दखल घेत कार्यवाही करण्याचे आश्वासन दिले.
दरम्यान, भारतीय जनता पक्षाचे सभागृह प्रतोद ज्ञानेश्वर चौधरी आणि नगराध्यक्ष अभिजीत पाटील यांच्यात काही विकासकामांच्या मुद्द्यांवरून जोरदार खडाजंगी झाली. काही काळ सभागृहातील वातावरण तापले होते. अखेरीस दोन्ही बाजूंनी संयम राखण्याचे आवाहन करण्यात आल्यानंतर वाद निवळला.
या पार्श्वभूमीवर उपनगराध्यक्ष सौ. माधवी मकरंद पाटील यांनी मध्यस्थी करत लोकशाहीच्या सर्वोच्च सभागृहाचा सन्मान राखण्याचे आवाहन केले. तसेच अधिकारी आणि कर्मचाऱ्यांनी सदस्यांच्या प्रश्नांना समाधानकारक व माहितीपूर्ण उत्तरे देणे आवश्यक असल्याचे त्यांनी स्पष्ट केले.
नगराध्यक्ष अभिजीत पाटील, संतोष वाल्हे, ललित छाजेड आणि सागर मराठे यांनी काही संवेदनशील विषयांवर आक्रमक, तर काही जनहिताच्या मुद्यांवर संयमी भूमिका घेत सभेचे कामकाज सुरळीत ठेवण्याचा प्रयत्न केला.
सभेतील महत्त्वाचे निर्णय पुढीलप्रमाणे :
- मागील सभेचे इतिवृत्त योग्य नोंदींच्या अटीवर मंजूर.
- नगरसेवकांना क्षमता बांधणी व विविध शासकीय योजनांच्या प्रशिक्षणासाठी पाठविण्याचा निर्णय मंजूर.
- अमरधाम येथे नवीन रामधून ध्वनी प्रणाली बसविणे व साफसफाईसाठी निधी मंजूर.
- नगरपरिषदेच्या खुल्या जागा तात्पुरत्या भाड्याने देण्यासाठी शुल्क निश्चितीचा विषय पुढील निर्णयापर्यंत स्थगित.
- स्वच्छता कर्मचाऱ्यांना शासकीय सुट्टीतील कामाचा मोबदला देण्यास मंजुरी.
- कुकडेल येथील अमरधामसमोरील रस्त्यातील अतिक्रमण हटविण्यास मंजुरी.
- शहरातील गतिरोधकांवर पांढरे पट्टे व रिफ्लेक्टर पेंट करण्यास मंजुरी.
- नगरपरिषद प्राथमिक शाळांच्या दुरुस्ती व पायाभूत सुविधांबाबतचा विषय स्थगित.
- ऊर्जा संवर्धन तंत्रज्ञानांतर्गत मंजूर वातानुकूलन यंत्रणांसाठी स्थळ निश्चिती मंजूर.
- जुना मोहिदा रस्त्यावर महाराणा प्रतापसिंह यांच्या पुतळ्यासाठी ना-हरकत प्रमाणपत्र मंजूर.
- आरक्षण क्र. ३४ मधील भाजी मार्केटची जागा पोलीस स्टेशनसाठी उपलब्ध करून देण्यास मंजुरी.
याशिवाय ऐनवेळी आलेल्या सुमारे बारा विषयांवरही चर्चा होऊन मंजुरी देण्यात आली.
सभेत उपनगराध्यक्ष सौ. माधवी मकरंद पाटील, बांधकाम सभापती संतोष वाल्हे, पाणीपुरवठा सभापती प्रदीप ठाकरे, शिक्षण सभापती भावना कदम यांच्यासह नगरसेवक ज्ञानेश्वर चौधरी, हरीश पाटील, ललित छाजेड, सागर मराठे, ॲड. दानिश पठाण आणि वसीम तेली यांनी विविध लोकहिताच्या मुद्यांवर मते मांडली.
