शहादा, दि. ०३ (प्रतिनिधी) : शहादा नगरपालिकेच्या प्रभाग क्रमांक १४ मधील जैन प्लाझा ते साईबाबा नगर या अंतर्गत रस्त्यावर वाढलेल्या अवजड वाहनांच्या वाहतुकीमुळे नागरिकांच्या सुरक्षेचा प्रश्न गंभीर बनला आहे. या मार्गावर तातडीने लोखंडी उंची-प्रतिबंधक कमान उभारण्यात यावी, अशी मागणी प्रभागाच्या नगरसेविका सौ. ममता हेमराज पवार यांनी शहादा नगरपालिकेचे मुख्याधिकारी यांच्याकडे निवेदनाद्वारे केली आहे.
गुरुवारी झालेल्या सर्वसाधारण सभेत ऐनवेळी उपस्थित करण्यात आलेल्या या विषयाबाबत नगरसेविका ममता पवार यांनी प्रशासनाचे लक्ष वेधले. त्यांनी दिलेल्या निवेदनात म्हटले आहे की, जैन प्लाझा ते साईबाबा नगर या रस्त्यावरून मोठ्या प्रमाणावर अवजड वाहनांची बेकायदेशीर आणि धोकादायक पद्धतीने वाहतूक सुरू आहे.
हा रस्ता पूर्णपणे निवासी भागातून जात असून परिसरात विविध खासगी शिकवणी वर्ग आहेत. त्यामुळे लहान मुले, विद्यार्थी, महिला आणि ज्येष्ठ नागरिकांचा या मार्गावर दिवसभर वावर असतो. अवजड वाहनांच्या वाढत्या रहदारीमुळे यापूर्वी परिसरात लहान-मोठे अपघात घडले असून भविष्यात मोठी दुर्घटना घडण्याची भीती नागरिकांनी व्यक्त केली आहे.
परिसरातील नागरिकांमध्ये भीतीचे वातावरण निर्माण झाले असून या समस्येवर कायमस्वरूपी तोडगा काढण्यासाठी जैन प्लाझा आणि साईबाबा नगरच्या शेवटच्या टोकाला, बायपास राष्ट्रीय महामार्गाकडे जाणाऱ्या मार्गावर लोखंडी उंची-प्रतिबंधक कमान उभारणे अत्यंत आवश्यक असल्याचे निवेदनात नमूद करण्यात आले आहे.
ही कमान उभारण्यात आल्यास अवजड वाहनांना अंतर्गत रस्त्यावर प्रवेश करता येणार नाही आणि नागरिक तसेच विद्यार्थ्यांच्या सुरक्षिततेस मोठा दिलासा मिळेल, असा विश्वास नगरसेविका ममता पवार यांनी व्यक्त केला आहे.
दरम्यान, या मागणीमुळे प्रभाग क्रमांक १४ मधील रहिवाशांमध्ये समाधान व्यक्त होत असून पालिका प्रशासन या संदर्भात कोणती कार्यवाही करते, याकडे नागरिकांचे लक्ष लागले आहे.
