शहादा, दि. ०३ : महाराष्ट्र राज्य मराठी विश्वकोश निर्मिती मंडळ, मुंबई यांच्या वतीने ऑनलाइन पद्धतीने आयोजित करण्यात आलेल्या विश्वकोश ज्ञानवर्धन स्पर्धेत शहादा येथील वसंतराव नाईक माध्यमिक व उच्च माध्यमिक विद्यालयाच्या विद्यार्थ्यांनी राज्य, जिल्हा आणि तालुका पातळीवर उल्लेखनीय यश संपादन करत विद्यालयाच्या शिरपेचात मानाचा तुरा रोवला आहे.
इयत्ता नववीच्या विद्यार्थ्यांसाठी आयोजित करण्यात आलेल्या या ऑनलाइन स्पर्धेत एका तासाच्या कालावधीत १०० गुणांसाठी ५० बहुपर्यायी प्रश्न विचारण्यात आले होते. या स्पर्धेत विद्यालयातील एकूण २१ विद्यार्थ्यांनी उत्स्फूर्त सहभाग नोंदविला.
स्पर्धेत विद्यालयाचा विद्यार्थी अर्जुन कोळी याने संपूर्ण महाराष्ट्रात द्वितीय क्रमांक पटकावला, तर मेहुल बारी याने राज्यात चतुर्थ क्रमांक मिळवून विद्यालयाचे नाव उज्ज्वल केले. राज्यस्तरीय यश संपादन करणाऱ्या या विद्यार्थ्यांचा आगामी काळात राज्याचे मुख्यमंत्री Devendra Fadnavis यांच्या हस्ते विशेष गौरव सोहळ्यात सत्कार करण्यात येणार आहे.
जिल्हास्तरावर रोशन बोरसे यांनी प्रथम, रितिक जाधव यांनी द्वितीय आणि प्रशांत अहिरे यांनी तृतीय क्रमांक मिळविला. तसेच तालुकास्तरावर वैभव ईशी यांनी प्रथम, रूपेश मराठे यांनी द्वितीय आणि अल्तमश मन्यार यांनी तृतीय क्रमांक पटकावत विद्यालयाचा लौकिक वाढविला.
या यशाबद्दल विद्यालयात विशेष सत्कार समारंभाचे आयोजन करण्यात आले होते. संस्थेचे सचिव प्रा. संजय जाधव, सोनामाई शिक्षण प्रसारक मंडळाच्या सचिव सौ. वर्षा जाधव, संकुलाचे प्रशासकीय प्रमुख डॉ. हिमांशु जाधव, विद्यालयाचे प्राचार्य जे. एम. पाटील, उपप्राचार्य जे. बी. पवार, उपमुख्याध्यापक बोरसे एस. आर., पर्यवेक्षक खान ए. ए. व खेडकर ए. डी., तसेच केंद्र समन्वयक नेरकर पी. बी. यांच्या हस्ते विद्यार्थ्यांना प्रशस्तीपत्रे, धनादेश आणि स्मृतीचिन्ह देऊन गौरविण्यात आले.
कार्यक्रमाचे सूत्रसंचालन व आभार प्रदर्शन व्ही. एस. पावरा यांनी केले. कार्यक्रम यशस्वी करण्यासाठी विद्यालयाच्या सांस्कृतिक समितीच्या सदस्यांनी आणि शिक्षकांनी विशेष परिश्रम घेतले. विद्यार्थ्यांच्या या यशाबद्दल सर्व स्तरांतून त्यांच्यावर अभिनंदनाचा वर्षाव होत आहे.
