नगराध्यक्षा ऐश्वर्याताई अभिजीत पाचर्णे व उपनगराध्यक्ष मितेश गादिया यांच्या निर्देशानुसार संयुक्त पाहणी; आमदार ज्ञानेश्वर उर्फ माऊलीआबा कटके यांनी निकृष्ट कामावर घेतला आक्षेप
प्रतिनिधी
शिरूर : शिरूर शहरातील पाचकंदील चौक परिसरात करण्यात आलेल्या सिमेंट रस्त्याच्या कामाबाबत नागरिकांकडून सातत्याने तक्रारी व नाराजी व्यक्त केली जात होती. रस्त्याचा दर्जा, रुंदी, वापरण्यात आलेल्या साहित्याची गुणवत्ता तसेच प्रत्यक्ष कामाच्या पद्धतीवर प्रश्नचिन्ह उपस्थित केले जात होते. या पार्श्वभूमीवर २८ मे रोजी नागरिकांच्या भावना व तक्रारींना वाचा फोडणारे वृत्त प्रसिद्ध झाल्यानंतर नगरपरिषद प्रशासनाने या प्रकरणाची गंभीर दखल घेतली.
नगराध्यक्षा ऐश्वर्या अभिजीत पाचर्णे यांनी तातडीने संबंधित अधिकाऱ्यांना प्रत्यक्ष पाहणीचे आदेश दिले. त्यानुसार उपनगराध्यक्ष मितेश गादिया, नगरसेवक, नगरसेविका तसेच बांधकाम विभागाच्या अधिकाऱ्यांनी पाचकंदील चौकातील सिमेंट रस्त्याची संयुक्त पाहणी केली.
यानंतर ६ जून रोजी शिरूर-हवेलीचे आमदार ज्ञानेश्वर उर्फ माऊलीआबा कटके यांनी नगराध्यक्षा ऐश्वर्याताई पाचर्णे, उपनगराध्यक्ष मितेश गादिया, नगरसेवक, नगरसेविका व संबंधित अधिकाऱ्यांसह प्रत्यक्ष स्थळ पाहणी केली. पाहणीदरम्यान आमदार कटके यांनी रस्त्याच्या कामातील गुणवत्तेबाबत गंभीर आक्षेप नोंदवत हे काम निकृष्ट दर्जाचे असल्याचे स्पष्ट केले. त्यांनी संबंधित ठेकेदाराशी दूरध्वनीवर संपर्क साधून तांत्रिक निकषांनुसार दर्जेदार काम करण्याच्या सक्त सूचना दिल्या.
पाहणीदरम्यान नागरिकांनी मांडलेल्या तक्रारी व कामातील त्रुटींची सखोल तपासणी करण्यात आली. नगराध्यक्षा ऐश्वर्या अभिजीत पाचर्णे आणि उपनगराध्यक्ष मितेश गादिया यांनी बांधकाम विभागाला आवश्यक ती कार्यवाही करण्याचे निर्देश दिले. त्यानंतर संबंधित ठेकेदाराला तातडीने बोलावून कामाबाबत जाब विचारण्यात आला.
यावेळी संबंधित ठेकेदाराला संपूर्ण सिमेंट रस्ता स्वखर्चाने उखडून तांत्रिक निकषांनुसार नव्याने दर्जेदार काम करण्याचे आदेश देण्यात आले. त्यानुसार आज पाचकंदील चौकातील सिमेंट रस्ता पूर्णपणे उखडण्याचे काम सुरू करण्यात आले असून नव्याने होणारे काम सर्व तांत्रिक निकषांचे पालन करून गुणवत्तापूर्ण पद्धतीने पूर्ण करण्याच्या सूचना देण्यात आल्या आहेत. या कामाचा संपूर्ण खर्च संबंधित ठेकेदाराकडूनच करण्यात येणार आहे.
सार्वजनिक निधीतून होणाऱ्या विकासकामांमध्ये कोणतीही तडजोड सहन केली जाणार नाही, अशी स्पष्ट भूमिका नगराध्यक्षा ऐश्वर्या अभिजीत पाचर्णे यांनी घेतली आहे. प्रत्येक विकासकामाची गुणवत्ता, पारदर्शकता आणि टिकाऊपणा कायम राखण्यासाठी बांधकाम विभागाला सातत्याने देखरेख ठेवण्याच्या सूचना देण्यात आल्या आहेत.
या कारवाईमुळे पाचकंदील चौकातील नागरिकांमध्ये समाधानाचे वातावरण निर्माण झाले आहे. नागरिकांच्या तक्रारींवर तातडीने दखल घेत निकृष्ट कामावर कारवाई करण्यात आल्याने नगरपरिषदेच्या उत्तरदायित्वपूर्ण भूमिकेचे सर्व स्तरातून स्वागत होत आहे.
निकृष्ट कामावर तातडीची कारवाई :
- २८ मे रोजी नागरिकांच्या तक्रारींवर वृत्त प्रसिद्ध.
- नगराध्यक्षा ऐश्वर्या अभिजीत पाचर्णे यांनी तातडीने दखल घेतली.
- ६ जून रोजी आमदार ज्ञानेश्वर उर्फ माऊलीआबा कटके यांनी प्रत्यक्ष पाहणी केली.
- संबंधित ठेकेदाराला दूरध्वनीवर जाब विचारत दर्जेदार कामाच्या सूचना.
- उपनगराध्यक्ष मितेश गादिया, नगरसेवक, नगरसेविका व अधिकाऱ्यांकडून संयुक्त पाहणी.
- संबंधित ठेकेदाराला स्वखर्चाने संपूर्ण रस्ता उखडण्याचे आदेश.
- नव्याने होणारे काम तांत्रिक निकषांनुसार पूर्ण करण्याच्या सूचना.
