प्रतिनिधी :-
कोयना : कोयना धरण क्षेत्रात गेल्या दोन दिवसांपासून सुरू असलेल्या जोरदार पावसामुळे धरणातील पाणीसाठ्यात लक्षणीय वाढ होत आहे. सातारा जिल्ह्याच्या पश्चिम भागात पावसाचा जोर कायम असून धरण क्षेत्रातील नद्यांना व ओढ्यांना चांगला पूर आला आहे.
मंगळवारी सकाळपर्यंतच्या २४ तासांत नवजा येथे ६५ मिलिमीटर, तर महाबळेश्वर येथे ५३ मिलिमीटर पावसाची नोंद करण्यात आली. कोयना धरणाच्या पाणलोट क्षेत्रातही संततधार पाऊस सुरू असल्याने अवघ्या दोन दिवसांत धरणातील पाणीसाठ्यात जवळपास अर्धा टीएमसीने वाढ झाली आहे.
मंगळवारी सकाळी कोयना धरणात सुमारे २ हजार ७५८ क्यूसेक वेगाने पाण्याची आवक सुरू होती. सध्या धरणातील एकूण पाणीसाठा १४.४८ टीएमसीपर्यंत पोहोचला आहे. पावसाचा जोर कायम राहिल्यास आगामी दिवसांत पाणीसाठ्यात आणखी वाढ होण्याची शक्यता व्यक्त केली जात आहे.
पश्चिम भागातील कास, बामणोली, तापोळा, कोयना, नवजा, महाबळेश्वर तसेच संपूर्ण कांदाटी खोऱ्यात मुसळधार पाऊस सुरू आहे. याचबरोबर धोम, कण्हेर, उरमोडी, तारळी आणि बलकवडी धरण परिसरातही पावसाची चांगली नोंद होत आहे.
दरम्यान, राधानगरी धरण क्षेत्रातही मोठ्या प्रमाणात पाऊस सुरू असून पश्चिम महाराष्ट्रातील जलसाठ्यांना याचा मोठा फायदा होत आहे. तुलनेने करवीर, हातकणंगले, शिरोळ आणि कागल या पूर्व भागात पावसाचे प्रमाण कमी असले तरी पश्चिमेकडील मुसळधार पावसामुळे धरणांमध्ये हळूहळू पाणी वाढत आहे.
हवामान विभागाच्या अंदाजानुसार पुढील २४ ते ४८ तासांत घाटमाथा परिसरात मध्यम ते जोरदार पावसाची शक्यता असल्याने कोयना व इतर धरणांच्या पाणीसाठ्यात आणखी वाढ अपेक्षित आहे.
