२८ वर्षांच्या प्रदीर्घ सेवेनंतर भावपूर्ण निरोप
परभणी | प्रतिनिधी
परभणी जिल्ह्यातील सोनपेठ येथील श्री महालिंगेश्वर विद्यालयाचे ग्रंथपाल तथा सोनपेठ ग्रंथ वाचन चळवळीचे संस्थापक अध्यक्ष श्री. राजेश्वर खेडकर हे २८ वर्षांच्या प्रदीर्घ सेवेनंतर दि. ३० जून २०२६ रोजी नियत वयोमानानुसार सेवानिवृत्त झाले.
खेडकर सरांनी १९९७ साली ग्रंथपाल पदाची सूत्रे स्वीकारली. गेल्या २८ वर्षांत त्यांनी विद्यालयाचे ग्रंथालय केवळ पुस्तकांचे भांडार न ठेवता विद्यार्थ्यांसाठी खऱ्या अर्थाने ज्ञानमंदिर बनवले. त्यांच्या कार्यकाळात ग्रंथालयातील पुस्तकांची संख्या, विद्यार्थ्यांची वाचनाची आवड आणि ग्रंथालयाचा दर्जा लक्षणीयरीत्या वाढला. “वाचाल तर वाचाल” हा संदेश त्यांनी हजारो विद्यार्थ्यांच्या मनात रुजवला.
सेवानिवृत्ती निमित्त आयोजित निरोप समारंभात विद्यालयाच्या वतीने खेडकर सरांचा सपत्निक शाल, श्रीफळ व भेटवस्तू देऊन सत्कार करण्यात आला.
या कार्यक्रमाच्या अध्यक्षस्थानी विद्यालयाचे मुख्याध्यापक अच्युतराव भोसले होते. प्रमुख उपस्थितीत विद्यालयाचे माजी मुख्याध्यापक एम. एस. निलंगे, डी. आर. गव्हाणे, कै. बाजीराव देशमुख विद्यालयाचे मुख्याध्यापक राजकुमार धबडे, सोनपेठ ग्रंथ वाचन चळवळीचे मार्गदर्शक सतीश देशमुख, प्रा. डॉ. संतोष रनखांब, पर्यवेक्षक रमाकांत होडगे आदी मान्यवर उपस्थित होते.
कार्यक्रमास संस्थेतील शिक्षक-शिक्षकेतर कर्मचारी, ग्रंथ वाचन चळवळीचे पदाधिकारी, पत्रकार, प्राध्यापक, मित्रमंडळ, माजी विद्यार्थी व पालक मोठ्या संख्येने उपस्थित होते.
यावेळी मुख्याध्यापक अच्युतराव भोसले यांनी खेडकर सरांच्या कार्याचा गौरव करताना सांगितले की, “खेडकर सर म्हणजे ग्रंथालयाचा चालता-बोलता कोश होते. कोणत्या कपाटात कोणते पुस्तक आहे, हे त्यांना तोंडपाठ होते. त्यांनी शाळेला दिलेले योगदान अविस्मरणीय आहे.”
माजी मुख्याध्यापक एम. एस. निलंगे, राजकुमार धबडे आणि सतीशराव देशमुख यांनीही खेडकर यांच्या कार्याचे कौतुक करत त्यांच्या निवृत्तीनंतरचे आयुष्य निरोगी, आनंदी व समाधानाचे जावो, अशा शुभेच्छा दिल्या.
सत्काराला उत्तर देताना भावूक झालेले राजेश्वर खेडकर म्हणाले, “हे विद्यालय आणि ग्रंथालय हेच माझे कुटुंब होते. विद्यार्थ्यांच्या चेहऱ्यावर पुस्तक वाचतानाचा आनंद पाहणे हेच माझ्या सेवेचे खरे फळ होते. सर्वांच्या प्रेमाबद्दल मी ऋणी आहे.”
ते पुढे म्हणाले की, सोनपेठ ग्रंथ वाचन चळवळीच्या माध्यमातून ग्रंथप्रेमींच्या सहकार्याने लाखो रुपयांची पुस्तके शाळेसह महाराष्ट्रातील अनेक शाळांना उपलब्ध करून देण्याचे भाग्य लाभले. लोप पावत चाललेली वाचन संस्कृती जपण्यासाठी केलेले कार्य हेच आयुष्यातील मोठे समाधान असल्याचे त्यांनी सांगितले.
कार्यक्रमाची सांगता स्नेहभोजनाने झाली. अनेक माजी विद्यार्थ्यांनी उपस्थित राहून सरांबद्दलच्या आठवणींना उजाळा दिला.
कार्यक्रमाचे सूत्रसंचालन नामदेव निळे यांनी केले, तर प्रास्ताविक व आभार प्रदर्शन पर्यवेक्षक रमाकांत होडगे यांनी केले.
श्री महालिंगेश्वर विद्यालय परिवार व सोनपेठकर नागरिकांच्या वतीने राजेश्वर खेडकर यांच्या निवृत्तीनंतरच्या आरोग्यदायी व आनंदी आयुष्यासाठी हार्दिक शुभेच्छा देण्यात आल्या.
