जिल्हा उपनिबंधकांना स्वतंत्र अहवाल सादर करण्याचे आदेश
जळगाव
जळगाव जिल्हा मध्यवर्ती सहकारी बँकेत सुरू असलेल्या कंत्राटी (Contract Basis) नोकरभरती प्रक्रियेबाबत गंभीर आक्षेप घेत विभागीय सहनिबंधक, नाशिक यांनी चौकशीचे आदेश दिले आहेत. लोकनियुक्त सरपंच तथा सामाजिक कार्यकर्ते श्री. सुरेशआप्पा गो. पाटील (झुरखेडा) यांनी केलेल्या तक्रारीची दखल घेत जिल्हा उपनिबंधक, सहकारी संस्था, जळगाव यांना तातडीने चौकशी करून स्वतंत्र अहवाल सादर करण्याचे निर्देश देण्यात आले आहेत.
श्री. पाटील यांनी आपल्या तक्रारीत शासनाच्या निर्णयाचे उल्लंघन करून जळगाव जिल्हा मध्यवर्ती सहकारी बँकेत कंत्राटी पद्धतीने भरती प्रक्रिया सुरू करण्यात आल्याचा आरोप केला आहे. शासनाने नियमित भरतीस परवानगी दिली असताना पारदर्शकता आणि गुणवत्तेच्या तत्त्वांनुसार भरती प्रक्रिया राबविणे बंधनकारक असल्याचे त्यांनी नमूद केले आहे.
मात्र, विद्यमान संचालक मंडळाने शासनाच्या आदेशांकडे दुर्लक्ष करून कंत्राटी भरती प्रक्रिया सुरू केल्याचा दावा तक्रारीत करण्यात आला आहे.
या तक्रारीची गंभीर दखल घेत विभागीय सहनिबंधक, नाशिक यांनी जिल्हा उपनिबंधकांना तक्रारीतील सर्व मुद्द्यांची सविस्तर चौकशी करून लवकरात लवकर अहवाल सादर करण्याचे आदेश दिले आहेत.
तसेच चौकशी अहवाल प्राप्त होईपर्यंत भरती प्रक्रियेबाबत कोणतीही पुढील कार्यवाही करू नये, अन्यथा भविष्यात उद्भवणाऱ्या वादासाठी संबंधित अधिकारी जबाबदार राहतील, असा स्पष्ट इशाराही आदेशपत्रात देण्यात आला आहे.
या आदेशामुळे जळगाव जिल्हा मध्यवर्ती सहकारी बँकेतील कंत्राटी भरती प्रक्रियेवर प्रश्नचिन्ह निर्माण झाले असून, चौकशी अहवालानंतर प्रशासन कोणता निर्णय घेते याकडे सर्वांचे लक्ष लागले आहे.
