विभागीय सहनिबंधकांना तातडीच्या कार्यवाहीचे सहकार आयुक्तांचे निर्देश
जळगाव | दि. ३
जळगाव जिल्हा मध्यवर्ती सहकारी बँक लि. संदर्भात लोकनियुक्त सरपंच तथा तक्रारदार श्री. सुरेशआप्पा गो. पाटील (झुरखेडा, ता. धरणगाव, जि. जळगाव) यांनी सादर केलेल्या तक्रार अर्जाची सहकार आयुक्त व निबंधक, सहकारी संस्था, महाराष्ट्र राज्य, पुणे यांनी दखल घेतली आहे. या प्रकरणी विभागीय सहनिबंधक, सहकारी संस्था, नाशिक यांना त्वरित आवश्यक कार्यवाही करण्याचे निर्देश देण्यात आले आहेत.
दि. २ जुलै २०२६ रोजी जारी करण्यात आलेल्या पत्रानुसार, श्री. पाटील यांनी ३० जून २०२६ रोजी सादर केलेल्या अर्जामध्ये जळगाव जिल्हा मध्यवर्ती सहकारी बँकेत बँकिंग कायदा (सुधारणा) अधिनियम, २०२५, भारतीय रिझर्व्ह बँकेच्या (RBI) मार्गदर्शक सूचना तसेच महाराष्ट्र शासनाच्या आदेशांचे उल्लंघन झाल्याचा आरोप करण्यात आला आहे.
तक्रारीत बँकेतील कथित नियमबाह्य कारभाराची सखोल चौकशी करून संबंधित अधिकारी व संचालकांवर कायदेशीर तसेच प्रशासकीय कारवाई करण्याची मागणी करण्यात आली आहे.
सहकार आयुक्त कार्यालयाने हे निवेदन विचारात घेऊन संबंधित विभागाला शासन निर्णय व धोरणांच्या अनुषंगाने आवश्यक ती कार्यवाही करण्याचे निर्देश दिले आहेत. तसेच करण्यात आलेल्या कार्यवाहीबाबत अर्जदारास कळविण्याचे आदेशही देण्यात आले आहेत.
या घडामोडीमुळे जळगाव जिल्हा मध्यवर्ती सहकारी बँकेच्या कारभाराबाबत नव्याने चर्चा सुरू झाली असून, विभागीय स्तरावर होणाऱ्या चौकशी व पुढील निर्णयाकडे सहकार क्षेत्राचे लक्ष लागले आहे.
