कराड येथे मान्यवरांच्या हस्ते सत्कार; विद्यार्थ्यांच्या गुणवत्तावाढीत मोलाचे योगदान
निलंगा प्रतिनिधी :
कराड येथील पीएमश्री नगरपरिषद कराड शाळा क्रमांक ३ मधील कर्तव्यदक्ष, अभ्यासू आणि विद्यार्थीप्रिय शिक्षक सतीश मोरे यांचा उत्कृष्ट मार्गदर्शक शिक्षक म्हणून मान्यवरांच्या हस्ते गौरव करण्यात आला. हा सत्कार कराडचे गटशिक्षणाधिकारी बिपिनजी मोरे तसेच नगराध्यक्ष राजेंद्रसिंह यादव (बाबा) यांच्या शुभहस्ते संपन्न झाला.
सतीश मोरे यांनी विद्यार्थ्यांच्या सर्वांगीण विकासासाठी सातत्याने घेतलेले परिश्रम, नाविन्यपूर्ण अध्यापन पद्धती, शिष्यवृत्ती तसेच विविध स्पर्धा परीक्षांसाठी केलेले प्रभावी मार्गदर्शन आणि गुणवत्तापूर्ण शिक्षणासाठी घेतलेली मेहनत यामुळे त्यांनी शिक्षण क्षेत्रात वेगळी ओळख निर्माण केली आहे. त्यांच्या मार्गदर्शनाखाली अनेक विद्यार्थ्यांनी उल्लेखनीय यश संपादन केले असून, त्यांनी आदर्श शिक्षक म्हणून आपला ठसा उमटवला आहे.
पीएमश्री नगरपरिषद कराड शाळा क्रमांक ३ ही गुणवत्तापूर्ण शिक्षण, आधुनिक अध्यापन पद्धती, विद्यार्थीकेंद्रित उपक्रम, संस्कारमूल्ये आणि शैक्षणिक उत्कृष्टतेसाठी परिसरात ओळखली जाते. विद्यार्थ्यांच्या सर्वांगीण विकासासाठी शाळेमध्ये विविध शैक्षणिक, सांस्कृतिक आणि क्रीडा उपक्रम सातत्याने राबविण्यात येतात. त्यामुळे ही शाळा पालक आणि विद्यार्थ्यांसाठी विश्वासार्ह शैक्षणिक संस्था म्हणून नावारूपास आली आहे.
यावेळी उपस्थित मान्यवरांनी सतीश मोरे यांच्या कार्याचे विशेष कौतुक करत त्यांच्या भावी शैक्षणिक वाटचालीस शुभेच्छा दिल्या. त्यांच्या या गौरवामुळे शिक्षकवर्गासह विद्यार्थ्यांमध्येही उत्साहाचे वातावरण निर्माण झाले आहे.
