भोकरदन | प्रतिनिधी
भोकरदन-जाफ्राबाद मतदारसंघातील कथित अवैध वृक्षतोडीचा मुद्दा आमदार संतोष पाटील दानवे यांनी विधानसभेत जोरदारपणे उपस्थित करत वन विभागाच्या कार्यपद्धतीवर प्रश्नचिन्ह उपस्थित केले. तसेच या प्रकरणाची सखोल चौकशी करून दोषींवर कठोर कारवाई करण्याची मागणी त्यांनी केली.
सभागृहात बोलताना आमदार दानवे यांनी काही वन अधिकारी आणि लाकूडतस्कर यांच्यात कथित संगनमत असल्याचा आरोप केला. वृक्षतोडीचे नियम शिथिल करण्यात आल्याने लाकूडतस्करांना प्रोत्साहन मिळत असल्याचा दावा त्यांनी केला.
एप्रिल आणि मे महिन्यात लाकडाने भरलेले २० ते २५ अवैध ट्रॅक्टर पकडून दिल्याची माहिती देत, तस्कर सुबाभूळ व निलगिरीच्या लाकडाच्या आड मौल्यवान वृक्षांची तस्करी करत असल्याचा आरोपही त्यांनी सभागृहात केला. मराठवाड्यातील वनसंपदा वेगाने नष्ट होत असल्याबद्दल त्यांनी चिंता व्यक्त केली.
यावर उत्तर देताना वनमंत्र्यांनी या प्रकरणाची सखोल चौकशी करून दोषी अधिकारी व संबंधित लाकूड व्यापाऱ्यांवर नियमानुसार कठोर कारवाई करण्यात येईल, असे आश्वासन सभागृहात दिले.
५ मिनिटांत झाड जमीनदोस्त
आमदार दानवे यांनी अत्याधुनिक इलेक्ट्रिक कटरच्या वापरामुळे काही मिनिटांत मोठमोठी झाडे तोडली जात असल्याचे नमूद करत, अशा प्रकारांना आळा घालण्यासाठी अधिक प्रभावी यंत्रणा उभारून कठोर कारवाई करण्याची गरज असल्याचे विधानसभेत अधोरेखित केले.
