श्रीगोंदा | प्रतिनिधी
ओंकार ग्रुपचे चेअरमन बाबूराव बोत्रे यांच्या वाढदिवसानिमित्त श्रीगोंदा तालुक्यातील हिरडगाव येथील गौरी शुगर अँड डिस्टिलरीज प्रा. लि. (युनिट क्रमांक ४) यांच्या वतीने विविध सामाजिक आणि समाजोपयोगी उपक्रमांचे आयोजन करण्यात आले.
शनिवार, दि. ११ जुलै रोजी गौरी शुगरच्या चेअरमन गौरीताई बाबूराव बोत्रे यांच्या प्रमुख उपस्थितीत कार्यक्रमाचा शुभारंभ झाला. यावेळी जिल्हा परिषद प्राथमिक शाळा हिरडगाव, चांडगाव आणि घोडेगाव येथील विद्यार्थ्यांना खाऊचे वाटप करण्यात आले. तसेच महामानव बाबा आमटे संस्थेच्या आश्रमाला कारखान्याच्या वतीने साखरेची मदत देण्यात आली.
सामाजिक बांधिलकी जपत सकाळी ११.४५ ते दुपारी ४.०० या वेळेत भव्य रक्तदान शिबिराचेही आयोजन करण्यात आले. या शिबिरात अनेक रक्तदात्यांनी उत्स्फूर्त सहभाग नोंदवत रक्तदान केले.
या प्रसंगी कारखान्याचे जनरल मॅनेजर रोहिदास यादव, हिरडगावच्या सरपंच विद्या बनकर, चांडगावचे सरपंच रवींद्र म्हस्के, घोडेगावचे लोकनियुक्त सरपंच रामदास घोडके, उपसरपंच नंदा माळी, गंगाराम दरेकर, चिमाजी दरेकर, संबंधित शाळांचे मुख्याध्यापक, कारखान्याचे अधिकारी-कर्मचारी तसेच ग्रामस्थ मोठ्या संख्येने उपस्थित होते.
वाढदिवसानिमित्त राबविण्यात आलेल्या या समाजोपयोगी उपक्रमांचे परिसरातून स्वागत करण्यात आले असून, शिक्षण, आरोग्य आणि सामाजिक सेवेला प्राधान्य देणाऱ्या या उपक्रमाचे सर्व स्तरांतून कौतुक होत आहे.
