सिंधुदुर्गनगरी | प्रतिनिधी
भारत निवडणूक आयोगाच्या निर्देशानुसार राबविण्यात येत असलेल्या विशेष सखोल पुनरीक्षण (Special Intensive Revision-SIR) कार्यक्रम–२०२६ अंतर्गत मतदार यादी अद्ययावत करण्यासाठी सुरू असलेल्या गणनापत्र (Enumeration Forms) वाटप व ऑनलाईन संगणकीकरण मोहिमेचा आढावा जिल्हाधिकारी तृप्ती धोडमिसे यांनी कणकवली तहसील कार्यालयात आयोजित बैठकीत घेतला.
बैठकीत कणकवली, देवगड आणि वैभववाडी तालुक्यांतील मोहिमेच्या प्रगतीचा सविस्तर आढावा घेण्यात आला. यावेळी जिल्हाधिकारी धोडमिसे यांनी सर्व मतदान केंद्रस्तरीय अधिकारी (BLO) आणि त्यांच्या पर्यवेक्षकांना आपल्या कार्यक्षेत्रातील गणनापत्रांचे शंभर टक्के वाटप विहित मुदतीत पूर्ण करण्याचे निर्देश दिले.
नागरिकांकडून प्राप्त होणाऱ्या गणनापत्रांचे अचूक व वेळेत ऑनलाईन संगणकीकरण करून संपूर्ण प्रक्रिया नियोजित कालमर्यादेत पूर्ण करण्यावर भर द्यावा, असेही त्यांनी स्पष्ट केले.
विशेष सखोल पुनरीक्षण कार्यक्रमाची प्रभावी अंमलबजावणी करण्यासाठी प्रत्येक मतदान केंद्रस्तरीय अधिकारी आणि संबंधित पर्यवेक्षकांनी जबाबदारीने काम करणे आवश्यक असल्याचे सांगताना, तांत्रिक अडचणींशिवाय कामात दिरंगाई करणाऱ्या किंवा असहकार्य करणाऱ्या अधिकारी-कर्मचाऱ्यांविरुद्ध प्रशासकीय शिस्तभंगाची कारवाई करण्यात येईल. आवश्यकतेनुसार निलंबनाचा प्रस्तावही सादर करण्यात येईल, असा इशाराही जिल्हाधिकारी तृप्ती धोडमिसे यांनी दिला.
या बैठकीस मतदार नोंदणी अधिकारी तथा उपविभागीय अधिकारी जगदीश कातकर, सहायक मतदार नोंदणी अधिकारी तथा तहसीलदार दिक्षांत देशपांडे, निवासी नायब तहसीलदार सूर्यकांत पाटील, नायब तहसीलदार, गट विकास अधिकारी, गट शिक्षणाधिकारी, तालुका कृषी अधिकारी, प्रशासकीय अधिकारी तसेच पर्यवेक्षक उपस्थित होते.
