श्रीरामपूर | प्रतिनिधी
श्रीरामपूर शहरातील नेवासा रोडवरील हॉटेल लक्ष्मीनारायणचे तरुण चालक व मालक आकाश शेखर दुबैया (वेंकट रामन) यांची शनिवारी दुपारी सुमारे ४ वाजण्याच्या सुमारास हॉटेलमध्येच चाकूने भोसकून हत्या करण्यात आल्याची धक्कादायक घटना घडली.
प्राथमिक माहितीनुसार, आरोपी सुरज जाधव व त्याच्या साथीदारांनी आकाश दुबैया यांच्यावर धारदार शस्त्राने हल्ला केला. गंभीर जखमी झालेल्या दुबैया यांना तातडीने साखर कामगार रुग्णालयात दाखल करण्यात आले. मात्र, तेथे प्रमुख वैद्यकीय अधिकारी डॉ. रविंद्र जगधने यांनी त्यांना मृत घोषित केले.
या हत्येमागील नेमके कारण अद्याप स्पष्ट झालेले नसून, पोलिसांनी घटनेचा तपास सुरू केला आहे. प्राथमिक माहितीनुसार, संशयित आरोपी सुरज जाधव हा नेवासा रोडवरील बसस्थानकासमोर चिकन टिक्का विक्रीचा व्यवसाय करतो. तसेच त्याचे शहरातील एका सराईत गुन्हेगाराशी संबंध असल्याची माहिती पोलिस सूत्रांकडून समोर आली आहे.
घटनेनंतर परिसरात एकच खळबळ उडाली असून, पोलिसांनी घटनास्थळी धाव घेत पंचनामा करून पुढील तपास सुरू केला आहे. आरोपींचा शोध घेण्यासाठी विशेष पथके कार्यरत असून, हत्येमागील नेमके कारण तपासानंतर स्पष्ट होणार आहे.
