मुंबई | मुलुंड पूर्व | प्रतिनिधी
मुलुंड पूर्व येथील गव्हाणपाडा परिसरातील पीएमजीपी वसाहतीत वाढत्या गैरप्रकारांमुळे नागरिकांमध्ये भीतीचे वातावरण निर्माण झाले आहे. परिसरात मद्यपी, अमली पदार्थांचे व्यसन करणारे तसेच काही तरुण-तरुणींकडून होणाऱ्या हुल्लडबाजीमुळे रहिवाशांनी पोलिसांकडे तातडीने कारवाईची मागणी केली आहे.
स्थानिक नागरिकांच्या म्हणण्यानुसार, वसाहतीत काही जण सार्वजनिक ठिकाणी धूम्रपान करत असून, मद्यधुंद अवस्थेत रस्त्यावर दारूच्या बाटल्या फोडून दहशत निर्माण करण्याचे प्रकार वारंवार घडत आहेत. त्यामुळे महिला, ज्येष्ठ नागरिक आणि लहान मुलांच्या सुरक्षिततेचा प्रश्न निर्माण झाला आहे.
रात्रीच्या वेळी अशा घटनांमध्ये वाढ होत असल्याने परिसरातील नागरिकांमध्ये असुरक्षिततेची भावना निर्माण झाली असून, या प्रकारांवर तातडीने आळा घालण्याची मागणी करण्यात येत आहे.
नागरिकांनी संबंधित पोलीस प्रशासनाने परिसरात नियमित गस्त वाढवावी, समाजकंटकांवर कठोर कारवाई करावी तसेच वसाहतीत कायदा व सुव्यवस्था कायम राखण्यासाठी आवश्यक उपाययोजना कराव्यात, अशी मागणी केली आहे.
दरम्यान, या प्रकरणाबाबत संबंधित यंत्रणांनी दखल घेऊन वस्तुस्थितीची पडताळणी करून योग्य ती कारवाई करावी, अशी अपेक्षा स्थानिक रहिवाशांनी व्यक्त केली आहे.
