कर्जत, रायगड | प्रतिनिधी
रायगड जिल्ह्यातील कर्जत तालुक्यातील चांदई येथे असलेल्या तासगावकर मेडिकल कॉलेजला बँक ऑफ इंडियाकडून जप्तीची नोटीस बजावण्यात आल्याची माहिती समोर आली आहे. बँकेने दिलेल्या नोटिशीनुसार, संबंधित संस्थेकडे सुमारे ७८ कोटी रुपयांची थकबाकी असल्याचा दावा करण्यात आला आहे.
मिळालेल्या माहितीनुसार, कर्जाची परतफेड न झाल्यामुळे लागू असलेल्या कायदेशीर तरतुदींनुसार बँकेने जप्तीची प्रक्रिया सुरू केली आहे. या घडामोडीमुळे विद्यार्थी, पालक आणि स्थानिक नागरिकांमध्ये चिंतेचे वातावरण निर्माण झाले असून या विषयाची परिसरात मोठी चर्चा सुरू आहे.
दरम्यान, या प्रकरणाबाबत संबंधित शैक्षणिक संस्थेकडून अद्याप कोणतेही अधिकृत स्पष्टीकरण किंवा भूमिका जाहीर करण्यात आलेली नाही. त्यामुळे बँकेच्या दाव्याबाबत संस्थेची बाजू समोर येणे बाकी आहे.
सध्या या प्रकरणाची पुढील कार्यवाही बँक आणि संबंधित संस्थेदरम्यान सुरू असलेल्या कायदेशीर प्रक्रियेनुसार होणार आहे. संबंधित संस्थेचे अधिकृत स्पष्टीकरण प्राप्त झाल्यानंतर त्यालाही योग्य प्रसिद्धी दिली जाईल.
