मारेगाव | प्रतिनिधी :
मारेगाव शहरात कथित अवैध दारू विक्री आणि जुगाराच्या प्रकारांवरून दोन गटांमध्ये बेदम हाणामारी झाल्याची घटना समोर आली आहे. या घटनेमुळे परिसरात काही काळ तणावाचे वातावरण निर्माण झाले असून संबंधितांवर कठोर कारवाई करण्याची मागणी नागरिकांकडून होत आहे.
मिळालेल्या माहितीनुसार, शहरातील बुद्ध विहार परिसरालगत कथितरित्या सुरू असलेल्या अवैध दारू भट्टीमध्ये जुगाराचे प्रकारही सुरू असल्याचा आरोप स्थानिकांकडून केला जात आहे. यापूर्वीही पोलिसांनी या ठिकाणी कारवाई केल्याचे सांगितले जात असले, तरी पुन्हा अशा प्रकारे अवैध धंदे सुरू असल्याचा आरोप नागरिकांनी केला आहे.
याच कथित अवैध जुगाराच्या कारणावरून दोन गटांमध्ये वाद होऊन त्याचे रूपांतर हाणामारीत झाले. घटनेनंतर परिसरात एकच खळबळ उडाली.
या संपूर्ण प्रकरणाची सखोल चौकशी करून दोषींवर कठोर कायदेशीर कारवाई करावी, तसेच परिसरातील कथित अवैध दारू व जुगार अड्ड्यांवर प्रभावी कारवाई करावी, अशी मागणी नागरिकांनी केली आहे.
दरम्यान, या प्रकरणाबाबत पोलिसांकडून अधिकृत माहिती किंवा गुन्हा दाखल झाल्याबाबतचे तपशील अद्याप समोर आलेले नाहीत. अधिकृत माहिती मिळाल्यानंतरच पुढील बाबी स्पष्ट होणार आहेत.
