ग्रामस्थांकडून पत्रकार, लोकप्रतिनिधी, प्रशासन व कंत्राटदारांचे आभार
महाबळेश्वर | प्रतिनिधी
मुख्यमंत्री ग्रामसडक योजनेअंतर्गत प्रजमा २६ ते घोणसपूर (ता. महाबळेश्वर, जि. सातारा) या रस्त्याच्या दुरवस्थेबाबत प्रसारमाध्यमांमध्ये प्रसिद्ध झालेल्या वृत्ताची प्रशासनाने तातडीने दखल घेत रस्त्याच्या दुरुस्तीचे काम सुरू केले आहे. या सकारात्मक कार्यवाहीमुळे घोणसपूर ग्रामस्थांनी समाधान व्यक्त करत पत्रकार, लोकप्रतिनिधी, प्रशासन आणि संबंधित कंत्राटदारांचे आभार मानले आहेत.
ग्रामस्थांच्या मते, लोकशाहीचा चौथा स्तंभ असलेल्या प्रसारमाध्यमांनी रस्त्याच्या दुरवस्थेचा प्रश्न प्रभावीपणे शासन व प्रशासनापर्यंत पोहोचवल्यामुळे या कामाला गती मिळाली. वृत्त प्रसिद्ध झाल्यानंतर स्थानिक लोकप्रतिनिधी, संबंधित अधिकारी आणि कंत्राटदारांनी तातडीने पाहणी करून दुरुस्तीची कार्यवाही सुरू केली.
या प्रश्नाची वस्तुनिष्ठपणे दखल घेऊन तो जनतेसमोर आणि शासनापर्यंत पोहोचविणाऱ्या सर्व पत्रकारांचे ग्रामस्थांनी विशेष आभार मानले. तसेच विषयाचे गांभीर्य ओळखून त्वरित प्रतिसाद देणाऱ्या प्रशासनातील अधिकारी, स्थानिक लोकप्रतिनिधी आणि संबंधित कंत्राटदार यांच्याबद्दलही कृतज्ञता व्यक्त करण्यात आली.
घोणसपूर हे ऐतिहासिक, धार्मिक आणि पर्यटनदृष्ट्या महत्त्वाचे गाव असून, भविष्यातही विकासकामे दर्जेदार व पारदर्शक पद्धतीने पूर्ण व्हावीत तसेच शासन, प्रशासन, लोकप्रतिनिधी आणि प्रसारमाध्यमांचे सहकार्य कायम राहावे, अशी अपेक्षा ग्रामस्थांनी व्यक्त केली.
