कडेगाव | प्रतिनिधी
कडेगाव पोलिसांनी चोरीच्या गुन्ह्याचा अवघ्या दोन दिवसांत यशस्वी छडा लावत दोन आरोपींना अटक केली असून, त्यांच्याकडून चोरीस गेलेली १ लाख रुपयांची रोकड जप्त करण्यात आली आहे.
याबाबत पोलिसांनी दिलेल्या माहितीनुसार, फिर्यादी अमित भास्कर कोतावळे (रा. गांधीनगर, कोल्हापूर) यांनी १० जुलै रोजी कडेगाव येथील रेडिमेड कपड्यांच्या दुकानासमोर उभ्या असलेल्या पिकअप वाहनातून अज्ञात चोरट्यांनी रोकड चोरून नेल्याची तक्रार कडेगाव पोलिस ठाण्यात दाखल केली होती. त्यानुसार गुन्हा नोंद करून तपास सुरू करण्यात आला.
पोलीस अधीक्षक तुषार दोशी, अपर पोलीस अधीक्षक कल्पना बारवकर आणि उपविभागीय पोलीस अधिकारी सदाशिव शेलार यांच्या मार्गदर्शनाखाली पोलीस निरीक्षक सुधीर तोरडमल यांच्या नेतृत्वाखालील पथकाने सीसीटीव्ही फुटेज, तांत्रिक विश्लेषण आणि गुप्त माहितीच्या आधारे तपासाची चक्रे फिरवली.
तपासादरम्यान दत्ता तुकाराम खांडेकर (रा. हणमंतगाव, जि. सोलापूर) आणि जीवन आनंद चव्हाण (रा. आनंदनगर, कोडोली, जि. कोल्हापूर) यांना ताब्यात घेण्यात आले. चौकशीदरम्यान दोन्ही आरोपींनी चोरीची कबुली दिली असून, त्यांच्याकडून चोरीस गेलेली १ लाख रुपयांची रोकड जप्त करण्यात आली आहे.
या यशस्वी कारवाईबद्दल कडेगाव पोलिसांच्या तत्पर तपासाचे परिसरातून कौतुक होत आहे. पुढील तपास कडेगाव पोलीस करत आहेत.
