सांगली | प्रतिनिधी
सांगली जिल्ह्यातील मिरज तालुक्यात भेसळयुक्त दूध तयार करण्याचा धक्कादायक प्रकार उघडकीस आला आहे. सलगरे गावात दूध पावडर आणि खाद्य तेलाचा वापर करून दूध तयार केल्याचा संशय व्यक्त करण्यात आला असून, अन्न व औषध प्रशासनाने केलेल्या कारवाईत मोठ्या प्रमाणात संशयास्पद साहित्य जप्त करण्यात आले आहे.
अन्न व औषध प्रशासनाला या परिसरात दुधात भेसळ होत असल्याची गोपनीय माहिती मिळाल्यानंतर सहायक आयुक्त नीलेश मसारे यांच्या मार्गदर्शनाखाली विशेष पथकाने सकाळी छापा टाकला. या कारवाईदरम्यान दोन संशयित दूध उत्पादकांच्या ठिकाणी तपास करण्यात आला.
छाप्यात एका ठिकाणाहून तीन पोती दूध पावडर, दहा लिटर खाद्य तेल आणि सुमारे ६० लिटर संशयित दूध जप्त करण्यात आले. या प्रकरणी संबंधित दोघांविरोधात गुन्हा दाखल करण्यात आला असून, जप्त करण्यात आलेल्या साहित्याची तपासणी करण्यात येत आहे.
या कारवाईमुळे परिसरात खळबळ उडाली असून, नागरिकांच्या आरोग्याशी खेळ करणाऱ्यांविरोधात कठोर कारवाई करण्याची मागणी होत आहे. या प्रकरणाचा पुढील तपास पोलीस आणि अन्न व औषध प्रशासनाकडून सुरू आहे.
