करमाळा | प्रतिनिधी
मुख्यमंत्री बळीराजा शेत/पाणंद रस्ते योजनेची प्रभावी अंमलबजावणी करण्यासाठी करमाळा विधानसभा मतदारसंघाच्या क्षेत्रस्तरीय समितीच्या सह-अध्यक्षपदी भाजप नेते दिग्विजय बागल यांची नियुक्ती करण्यात आली आहे.
राज्यातील शेतकरी आणि ग्रामीण भागाला दर्जेदार शेत व पाणंद रस्त्यांची सुविधा उपलब्ध करून देण्यासाठी राबविण्यात येणाऱ्या या योजनेच्या अंमलबजावणीला अधिक गती देण्यासाठी मुख्यमंत्री देवेंद्र फडणवीस यांच्या सूचनेनुसार महसूल मंत्री चंद्रशेखर बावनकुळे यांनी प्रत्येक विधानसभा क्षेत्रस्तरीय समितीत सह-अध्यक्ष नियुक्त करण्याचा निर्णय घेतला आहे. त्यानुसार महसूल विभागाने आवश्यक आदेश जारी केले असून जिल्हाधिकाऱ्यांना तत्काळ कार्यवाही करण्याचे निर्देश देण्यात आले आहेत.
या निर्णयानुसार करमाळा विधानसभा मतदारसंघात दिग्विजय बागल यांची सह-अध्यक्ष म्हणून निवड करण्यात आली आहे.
या नियुक्तीमुळे पाणंद रस्ते योजनेची अंमलबजावणी अधिक समन्वयपूर्ण, गतिमान आणि प्रभावी होण्यास मदत होणार असून, ग्रामीण भागातील शेतकऱ्यांना दर्जेदार शेतरस्त्यांचा लाभ अधिक वेगाने मिळेल, अशी अपेक्षा व्यक्त करण्यात येत आहे.
