नाशिक प्रतिनिधी
नाशिक जिल्ह्यातील पेठ–गुजरात महामार्गावरील सावळ घाटात मंगळवारी रात्री भीषण रस्ता अपघात झाला. या दुर्घटनेत गुजरातमधील चार जणांचा जागीच मृत्यू झाला असून, एक जण गंभीर जखमी झाला आहे.
अपघाताची माहिती मिळताच पेठ पोलीस, स्थानिक नागरिक आणि आपत्कालीन बचाव पथक घटनास्थळी दाखल झाले. जखमीला तातडीने जवळच्या रुग्णालयात उपचारासाठी दाखल करण्यात आले असून त्याच्यावर उपचार सुरू आहेत.
पोलिसांनी मृतांची ओळख पटविण्याची प्रक्रिया सुरू केली असून, त्यांच्या नातेवाईकांना घटनेची माहिती देण्यात आली आहे.
प्राथमिक माहितीनुसार, वाहनावरील नियंत्रण सुटल्याने किंवा सावळ घाटातील वळणावरील परिस्थितीमुळे हा अपघात झाला असावा, असा अंदाज व्यक्त केला जात आहे. मात्र, अपघाताचे नेमके कारण अद्याप स्पष्ट झालेले नाही.
या प्रकरणी पेठ पोलिसांनी घटनेची नोंद करून पुढील तपास सुरू केला आहे.
