| प्रतिनिधी :
इंदापूर : तालुक्यातील राजकीयदृष्ट्या महत्त्वाची मानली जाणारी सपकळवाडी विविध कार्यकारी सेवा सहकारी सोसायटीच्या चेअरमनपदी सौ. रुक्मिणी रामचंद्र चव्हाण यांची बिनविरोध निवड करण्यात आली. या निवडीमुळे सोसायटीच्या कार्यात नव्या पर्वाची सुरुवात झाल्याची भावना सभासद व ग्रामस्थांनी व्यक्त केली.
निवडीनंतर नवनिर्वाचित पदाधिकाऱ्यांचा सत्कार करण्यात आला. यावेळी बापूराव सपकळ (माजी संचालक, श्री छत्रपती सहकारी साखर कारखाना, भवानीनगर), बी. के. सपकळ (माजी संचालक, कृषी उत्पन्न बाजार समिती, इंदापूर), अजित काका सपकळ, ज्ञानेश्वर मामा सपकळ, राजेंद्र सपकळ, विष्णू भुजबळ, पोपट पवार, शत्रुघ्न घाडगे, पांडुरंग सपकळ, राहुल सपकळ, हेमंत सपकळ, बापूराव जाधव, डी. पी. चव्हाण, कुंभार भाऊ, माने सर तसेच सपकळवाडी व हिंगणेवाडी येथील ग्रामस्थ मोठ्या संख्येने उपस्थित होते.
सहकार क्षेत्रात आणि स्थानिक राजकारणात प्रभावी संस्था म्हणून ओळखल्या जाणाऱ्या या सोसायटीच्या चेअरमनपदी सौ. रुक्मिणी चव्हाण यांची बिनविरोध निवड झाल्याने परिसरात समाधान व्यक्त करण्यात येत आहे.
विशेष म्हणजे, आगामी सपकळवाडी–हिंगणेवाडी ग्रामपंचायत निवडणुकीच्या पार्श्वभूमीवर झालेली ही निवड राजकीयदृष्ट्या महत्त्वाची मानली जात असून, स्थानिक राजकीय घडामोडींवर तिचा प्रभाव पडू शकतो, अशी चर्चा परिसरात सुरू आहे.
यावेळी उपस्थित मान्यवरांनी नवनिर्वाचित चेअरमनसह पदाधिकाऱ्यांचे अभिनंदन करत, सोसायटीच्या माध्यमातून शेतकरी, सभासद आणि सर्वसामान्यांच्या हिताचे निर्णय घेऊन गावाच्या सर्वांगीण विकासासाठी कार्य करावे, अशा शुभेच्छा व्यक्त केल्या.
