मानवत | प्रतिनिधी
जिद्द, कठोर परिश्रम आणि कुटुंबाच्या पाठबळाच्या जोरावर मानवत येथील काझी फरिहा अबूबैद सय्यद हिने राष्ट्रीय पात्रता व प्रवेश परीक्षा (NEET) मध्ये ५३७ गुण मिळवत ऑल इंडिया रँक ४८,३७५ प्राप्त केला आहे. या यशामुळे तिचा एमबीबीएस (MBBS) प्रवेशाचा मार्ग सुकर झाला असून सर्व स्तरांतून तिचे अभिनंदन होत आहे.
फरिहाचे वडील घड्याळ दुरुस्तीचा व्यवसाय करून कुटुंबाचा उदरनिर्वाह करतात. आर्थिक परिस्थिती बेताची असतानाही त्यांनी मुलांच्या शिक्षणात कोणतीही कमतरता भासू दिली नाही. वडिलांच्या कष्टाची जाणीव ठेवत फरिहाने सातत्यपूर्ण अभ्यास आणि मेहनतीच्या बळावर हे यश संपादन केले.
फरिहाच्या यशामागे तिच्या कुटुंबातील शैक्षणिक वातावरणाचीही महत्त्वाची भूमिका आहे. तिचा मोठा भाऊ BAMS चे शिक्षण घेत असून मोठी बहीण BAMS पूर्ण करून वैद्यकीय व्यवसाय करत आहे. भाऊ-बहिणीच्या यशातून प्रेरणा घेत फरिहानेही डॉक्टर होण्याचे स्वप्न उराशी बाळगले आणि ते साकार करण्याच्या दिशेने महत्त्वाचे पाऊल टाकले.
या यशात काझी फिजिक्स क्लासेसचे संचालक काझी कलीमुद्दीन सर यांच्या मार्गदर्शनाचा मोठा वाटा असल्याचे फरिहा व तिच्या पालकांनी सांगितले. विशेषतः भौतिकशास्त्र विषयातील संकल्पनात्मक तयारी आणि नियमित मार्गदर्शनामुळे आत्मविश्वास वाढल्याचे त्यांनी नमूद केले. तसेच गणेश सिरसकर आणि रमेश मुलगीर यांचेही तिला मोलाचे मार्गदर्शन लाभले.
फरिहाच्या या उल्लेखनीय यशाबद्दल काझी फिजिक्स क्लासेसचे शिक्षकवृंद, नातेवाईक, मित्रपरिवार आणि नागरिकांकडून तिच्यावर अभिनंदनाचा वर्षाव होत असून, तिच्या उज्ज्वल वैद्यकीय कारकिर्दीसाठी शुभेच्छा दिल्या जात आहेत.
