सारथी महाराष्ट्राचा न्यूज | कन्नड | प्रतिनिधी
वैध वैद्यकीय पदवी नसताना अनधिकृतपणे रुग्णांची तपासणी व उपचार केल्याचा आरोप असलेल्या मुंगसापूर येथील मुक्तानंद गिरी महाराज यांच्याविरोधात कन्नड ग्रामीण पोलीस ठाण्यात गुन्हा दाखल करण्यात आला आहे. तालुकास्तरीय बेकायदेशीर वैद्यकीय व्यवसाय शोधमोहीम पथकाच्या फिर्यादीवरून ही कारवाई करण्यात आली.
मिळालेल्या माहितीनुसार, २४ जून रोजी तालुका आरोग्य अधिकारी डॉ. योगेश सोळंके, अन्न व औषध प्रशासनाचे अधिकारी तसेच पंचायत समितीच्या पथकाने मुंगसापूर येथील आश्रमावर छापा टाकला. या कारवाईत रुग्ण तपासणीचे चार रजिस्टर, एक वही आणि औषधांची बाटली जप्त करण्यात आली.
त्यानंतर संबंधितांना वैद्यकीय व्यवसाय करण्यासाठी आवश्यक असलेली मान्यताप्राप्त पदवी व इतर कागदपत्रे सादर करण्याबाबत नोटीस देण्यात आली होती. मात्र, मुदत संपल्यानंतरही कोणतेही वैध पुरावे सादर न केल्याने जिल्हाधिकारी विनय गौडा व गटविकास अधिकारी ओमप्रकाश रामावत यांच्या आदेशानुसार ‘महाराष्ट्र वैद्यकीय व्यवसाय कायदा, १९६१’ च्या कलम ३३ अंतर्गत गुन्हा दाखल करण्यात आला आहे.
या प्रकरणी कारवाईची मागणी करत उदय गवळी, बबनराव पवार यांच्यासह अन्य कार्यकर्त्यांनी २८ जूनपासून उपोषण सुरू केले होते. गुन्हा दाखल झाल्यानंतर पोलीस अधिकारी अपराजिता अग्निहोत्री यांच्या निर्देशानुसार डॉ. प्रदीप कांबळे यांच्या हस्ते लिंबूपाणी पिऊन २१ व्या दिवशी उपोषण मागे घेण्यात आले.
या प्रकरणाचा पुढील तपास कन्नड ग्रामीण पोलीस करत आहेत.
