सारथी महाराष्ट्राचा न्यूज | कुरुंदवाड | प्रतिनिधी
शिरोळ तालुक्यातील तेरवाड (गंगापूर) येथे बुधवारी (दि. २२ जुलै) दुपारी शॉर्टसर्किटमुळे आयुब युसूफ बेपारी यांच्या घराला भीषण आग लागून लाखो रुपयांचे नुकसान झाले. या आगीत मुलीच्या प्रसूतीसाठी ठेवलेली सुमारे ९० हजार रुपयांची रोख रक्कम, सोने-चांदीचे दागिने तसेच संसारोपयोगी साहित्य जळून खाक झाले. सुदैवाने या दुर्घटनेत कोणतीही जीवितहानी झाली नाही.
दुपारी सुमारे २.३० वाजण्याच्या सुमारास घरातील बेडरूममधील विद्युत वायरिंगमध्ये शॉर्टसर्किट होऊन आग लागली. काही क्षणांतच धुराचे लोट संपूर्ण घरात पसरले. आरडाओरड ऐकून सामाजिक कार्यकर्ते इरफान बेपारी, स्वप्नील शिंदे, फारूक बेपारी, आदर्श उगळे, पंकज म्हावळे, विकास आवळे, सूरज उगळे यांच्यासह ग्रामस्थांनी आग विझविण्याचा प्रयत्न केला. मात्र आग वेगाने पसरल्याने कुरुंदवाड नगरपरिषदेच्या अग्निशमन दलाला पाचारण करण्यात आले.
अग्निशमन दलाचे नितीन संकपाळ आणि हेमंत वायचळ यांनी तातडीने घटनास्थळी दाखल होत गॅस सिलेंडर सुरक्षित बाहेर काढला. त्यानंतर छताचे पत्रे फोडून पाण्याचा मारा करत आग आटोक्यात आणली. त्यामुळे आग आणखी पसरण्याचा धोका टळला.
घटनेनंतर तेरवाडचे तलाठी एस. एस. खोत यांनी पंचनामा केला. तसेच ग्रामपंचायत अधिकारी संजय पुकाळे, सहाय्यक पोलीस निरीक्षक संतोष माने, माजी सरपंच संजय अनुसे आणि पंचायत समिती सभापती मिलिंद कुरणे यांनी घटनास्थळी भेट देऊन नुकसानग्रस्त कुटुंबीयांचे सांत्वन केले.
