बांबवडे | प्रतिनिधी
शाहूवाडी तालुक्यातील कडवी मध्यम प्रकल्पातून बंदिस्त पाईपलाईनद्वारे पाणी उपसा करून शाहूवाडी व पन्हाळा तालुक्यातील वंचित भागाला सिंचनाचे पाणी उपलब्ध करून देण्यासाठी नियोजित करण्यात आलेल्या उपसा सिंचन योजनेची पाहणी आमदार डॉ. विनय कोरे (सावकर) यांनी केली.
या योजनेअंतर्गत कडवी नदीवरील सावे (ता. शाहूवाडी) गावाच्या हद्दीतून जुळेवाडी खिंडीत बंदिस्त पाईपलाईनद्वारे पाणी उपसा करण्यात येणार आहे. या महत्त्वाकांक्षी शासकीय योजनेमुळे शाहूवाडी आणि पन्हाळा तालुक्यातील सुमारे ४ हजार हेक्टर शेती क्षेत्र सिंचनाखाली येणार असून, परिसरातील शेतकऱ्यांना मोठा दिलासा मिळणार आहे.
या योजनेचा लाभ गोगवे, बजागेवाडी, पाटणे, सावे, बहिरेवाडी, सावर्डे, मोळावडे, करंजोशी, आरूळ, आंबर्डे, ओकोली, करपेवाडी, परखंदळे, शित्तूर तर्फ मलकापूर, सोनवडे, पिशवी, साळशी, सुपात्रे, खुटाळवाडी, बोरिवडे, आवळी, पैजारवाडी, नावली, देवाळे आणि बोरपाडले या गावांतील शेतकऱ्यांना होणार आहे.
पाहणी दौऱ्यावेळी गोकुळ दूध संघाचे संचालक कर्णसिंह गायकवाड, जनसुराज्य शक्तीचे कोल्हापूर जिल्हा परिषदेचे गटनेते सर्जेराव पाटील तसेच स्थानिक लोकप्रतिनिधी, पदाधिकारी आणि कार्यकर्ते मोठ्या संख्येने उपस्थित होते.
