जामखेडचा सुपुत्र ओंकार मते महाराष्ट्र सुरक्षा बलात दाखल; दौंड येथे प्रशिक्षण यशस्वी पूर्ण

जामखेड | प्रतिनिधी

जामखेड तालुक्यातील मतेवाडी गावचे सुपुत्र ओंकार लक्ष्मण मते यांची महाराष्ट्र सुरक्षा बल (MSF) मध्ये निवड झाली असून, त्यांनी दौंड येथील राज्य राखीव पोलीस बल (SRPF) गट क्र. ७ प्रशिक्षण केंद्रातील खडतर प्रशिक्षण यशस्वीरीत्या पूर्ण केले आहे.

प्रशिक्षण पूर्ण झाल्यानंतर आयोजित करण्यात आलेल्या दीक्षांत संचलन (पासिंग आऊट परेड) सोहळ्यात ओंकार मते यांनी शासकीय गणवेशात देशसेवा व समाजसेवेची शपथ घेतली. हा सोहळा अत्यंत उत्साहपूर्ण आणि दिमाखदार वातावरणात पार पडला.

ओंकार मते यांच्या या उल्लेखनीय यशामुळे मतेवाडी गावासह संपूर्ण जामखेड तालुक्यात आनंदाचे वातावरण निर्माण झाले असून, ग्रामस्थांकडून त्यांच्यावर अभिनंदनाचा वर्षाव होत आहे.

जिद्द, मेहनत आणि चिकाटीच्या बळावर मिळविलेल्या या यशाबद्दल ओंकार मते यांचे सर्व स्तरांतून कौतुक होत असून, त्यांच्या पुढील सेवाकाळासाठी आणि उज्ज्वल भविष्यासाठी शुभेच्छा व्यक्त करण्यात येत आहेत.