ब्रम्हपुरी. | २३ जुलै २०२६
शिक्षण व्यवस्थेतील कथित अनागोंदी, NEET परीक्षा प्रकरणातील कथित गैरव्यवहार, विद्यार्थ्यांवरील अन्याय तसेच काँग्रेस नेते राहुल गांधी, खासदार प्रियंका गांधी, प्रदेशाध्यक्ष हर्षवर्धन सपकाळ आणि विधिमंडळ काँग्रेस पक्षनेते विजय वडेट्टीवार यांच्यावरील कारवाईच्या निषेधार्थ तालुका व शहर काँग्रेस कमिटीच्या वतीने गुरुवारी ब्रम्हपुरीत तीव्र आंदोलन करण्यात आले.
रास्ता रोको, धरणे आंदोलन, ब्रम्हपुरी बंद, पंतप्रधान नरेंद्र मोदी यांच्या प्रतिकात्मक पुतळ्याचे दहन तसेच दोन आंदोलनकर्त्यांनी केलेल्या मुंडणामुळे शहरातील राजकीय वातावरण चांगलेच तापले.
सकाळपासून अनेक व्यापारी प्रतिष्ठाने स्वयंस्फूर्तीने बंद ठेवण्यात आली. काही शाळा व महाविद्यालयांनीही बंदला प्रतिसाद दिल्याने शहरातील व्यवहारांवर परिणाम झाला. दुपारी छत्रपती शिवाजी महाराज चौकात काँग्रेस, युवक काँग्रेस, महिला काँग्रेस, सेवा दल व विविध आघाड्यांचे शेकडो कार्यकर्ते एकत्र येत केंद्र सरकारविरोधात घोषणाबाजी केली.
छत्रपती शिवाजी महाराज चौकातून ख्रिस्तानंद चौकापर्यंत मोर्चा काढण्यात आला. मोर्चामध्ये पंतप्रधान नरेंद्र मोदी यांच्या प्रतिकात्मक पुतळ्याची तिरडी नेण्यात आली. ख्रिस्तानंद चौकात या पुतळ्याचे दहन करण्यात आले.
आंदोलनादरम्यान विनोद झोडगे आणि रवी मैंद यांनी निषेध म्हणून सार्वजनिकरित्या मुंडण केले. विद्यार्थ्यांच्या भविष्याशी संबंधित प्रश्नांकडे सरकारचे लक्ष वेधण्यासाठी हा प्रतीकात्मक निषेध असल्याचे आंदोलनकर्त्यांनी सांगितले.
यानंतर ख्रिस्तानंद चौकात रास्ता रोको आंदोलन करण्यात आल्याने काही काळ वाहतूक विस्कळीत झाली. परिस्थिती नियंत्रणात आणण्यासाठी पोलिसांनी हस्तक्षेप करत काही प्रमुख आंदोलनकर्त्यांना ताब्यात घेतले.
ताब्यात घेण्यात आलेल्यांमध्ये खेमराज तिडके, योगेश मिसार, प्रमोद चिमुरकर, राजेश कांबळे, हितेंद्र राऊत, मोंटु पिलारे, मुकुंदा राऊत, विनोद झोडगे, अमित कन्नाके आणि नरेंद्र गाडगीलवार यांचा समावेश होता.
आंदोलनादरम्यान काँग्रेस पदाधिकाऱ्यांनी NEET परीक्षा प्रकरणातील दोषींवर कठोर कारवाई, विद्यार्थ्यांना न्याय आणि शिक्षण व्यवस्थेतील कथित गैरव्यवहाराची सखोल चौकशी करण्याची मागणी केली. दरम्यान, कायदा व सुव्यवस्था अबाधित राखण्यासाठी आंदोलनस्थळी मोठा पोलिस बंदोबस्त तैनात करण्यात आला होता.
